Johana 1 - UVORO GHWALOLI KWA WANDU WOSE

Ghore ya Umana

¹ Hambiri ya kuumbo urumengu, Ghore oluo, na Ghore oluwanyo na Mlungu, na Ghore oluo ni Mlungu mwenyi.

² Kufuma kudyowa Ghore oluwanyo na Mlungu.

³ Vindu vose vanadeilo kwa iye, na sikweo na iye, kindu chingi sichideilo ichi chideilo.

⁴ Amweni kwake koluo umana, nagho umana gholuo ni mlangazi ghwa wandu.

⁵ Mlangazi ghwalangaza kizeni na kiza sichidimagha kughuisa.

⁶ Koluo na mundu etumilo kufuma kwa Mlungu, na izina lyake ni Johana.

⁷ Ojile kughorera wandu ighulu ya mlangazi, eri wandu wose wadumuse kwa iye.

⁸ Iye seluo mlangazi, ela ojile kwa undu ghwa kughorera wandu gha mlangazi.

⁹ Mlangazi wa fulo emlangazagha kila mundu, oluo ukujagha urumenguni.

¹⁰ Naye Ghore oluo urumenguni, nagho urumengu ghodeilo kwa iye, ela urumengu sighomumanyile kungi.

¹¹ Ojile kele isanga lyake, nawo wandu wake siwamhokere kungi.

¹² Ela wose wamuhokere, wekedumusa kwa izina lyake, kawahawa udimo ghokala wana wa Mlungu.

¹³ Awa wavelo, si kwa bighati hata si kwa kushaya kwa muli hata kwa kushaya kwa mdamu, ela wavelo kufuma kwa Mlungu.

¹⁴ Naye Ghore kakala mdamu na kukalanya nesi, kejula mbazi na fulo; tikaona ubwaa ghwake, sa ubwaa ghwa Mwana mumojori afumile kwa Aba.

¹⁵ Johana kamushuhudia, keghamba, “Uyu niye nimughorere kamba, ‘Ukujagha nyuma yangu aniisile imi, kwani oluo hambiri yangu.’”

¹⁶ Na kufuma kwa ungi ghwa mbazi yake, itose tapata mbazi kwa mbazi.

¹⁷ Kwani Sheria yanajile kufuma kwa Mlungu kwa ngila ya Musa; ela mbazi na fulo ikeja kwa ngila ya Jesu Kristo.

¹⁸ Sikwesi mundungi amwonile Mlungu lyingi! Sala Mwana Mwenyi uyu ewo lagaeni kwa Aba, niye amumanyisa.

Ushuhuda ghwa Johana Mubatizi

¹⁹ Nagho ughu nigho ushuhuda ghwa Johana, ilyi Wayahudi wemutumilile wakohani na Walawi kufuma Jerusalemu kumkotela, “Uwe nuwe ani?”

²⁰ Naye kaghora mwazi saleghile, “Imi simi Masihi ungi.”

²¹ Nawo wakamkotela, “Nuwe ani? Nuwe Elija?” Naye kaghora, “Simi ungi.” Wakamkotela, “Ndamu nuwe tondolo?” Naye katumbulila, “Hata.”

²² Nawo wakamuza, “Nuwe ani? Tighorere eri tiwahawe matumbulilo awa watitumile. Wakughora uwe mwenyi nuwe ani?”

²³ Naye kawatumbulila, “Imi nimi lwaka lwa mundu mumoju ekemagha kireti, ‘Ghororeni ngila kwa undu ghwa Bwana.’ Selyi tondolo Isaya aghorire.”

²⁴ Nawo awa wandu wetumilo ni Wafarisayo.

²⁵ Nao wakamkotela, “Ndamu kudani ubatizagha, ikakala suwe ungi Masihi, ango Elija, ango tondolo?”

²⁶ Johana kawatumbulila, “Imi nabatiza na meji; ela uwo mumoju kimusi ghati yenyu simomumanyagha.

²⁷ Uyu ekujagha nyuma yangu, hata imi sifweni kufungula mkoa ghwa kilatu chake.”

²⁸ Agha ghose ghanadeikile Bethania, chambuko cha Jordani andu Johana eluo kebatizila.

Mwana wa ng'onzi wa Mlungu

²⁹ Ikesho lyake Johana kamwona Jesu kemjila, kaghora, “Loleni Mwana wa ng'onzi wa Mlungu, uyu efunyagha kaung'a za urumengu!

³⁰ Uyu niye neghorire, ‘Ukujagha mundu nyuma yangu aniisile imi, kwani oluo hambiri imi sevelo.’

³¹ Imi mwenyi semumanyile anduangi, ela kwa undu ghwake nanajile kubatiza kwa meji, eri amanyikane kwa wandu wa Israeli.”

³² Nao Johana kamshuhudia keghamba, “Naona Roho keselela sa iringo kufuma mlunguni, na kukala ighulu yake.

³³ Imi mwenyi semumanyile kungi, ela uyu anitumile kubatiza kwa meji kanuza, ‘Uyu umwonagha Roho kemselelela na kumkalila ighulu, uyu niye ebatizagha kwa Roho wa Kuela!’

³⁴ Nemi naona na kushuhudia kamba uyu ni Mwana wa Mlungu.”

Wairimi wa hambiri wa Jesu

³⁵ Ilyo ikesho lyake sena, Johana oluo kimusi na wairimi wake waili;

³⁶ naye aghenda amwona Jesu keita, kaghora “Loleni Mwana wa ng'onzi wa Mlungu.”

³⁷ Walye wairimi waili wasikila selyi aghorire, wakamwirima Jesu.

³⁸ Jesu kaghaluka na kuwaona wekemwirima, kawauza “Nini mwahada?” Nawo wakamuza, “Rabi” (kutambula kwake Mwalimu), “Wanakalagha hiyo?”

³⁹ Naye kawauza, “Njuuni muone.” Nao wakaghendanya wakaona andu akalagha; nawo wakasindanya naye msenya ghulya, kwani yeluo sa saa ikumi.

⁴⁰ Mumoju wa walye waili wamusikile Johana keghora na kumwirima, oluo Andrea wakwawe Simoni Petro.

⁴¹ Naye kamhada Simoni wakwawe, kamuza, “Tamwona Masihi” (kutambula kwake Kristo).

⁴² Naye kamghenza kwa Jesu. Jesu kamlola, na kumuza, “Uwe nuwe Simoni mwana wa Johana uitogho Kefa” (kutambula kwake Petro ango iwe)

Jesu kuwapang'a Filipo na Nathanieli

⁴³ Nao ilyo ikesho lyake Jesu kaghenda Galilaya. Naye kamwona Filipo na kumuza, “Niirime!”

⁴⁴ Naye Filipo oluo mundu wa kufuma Bethsaida, muzi ghwana Andrea na Petro.

⁴⁵ Filipo kamwona Nathanieli, kamuza, “Tamwona uyu awandiko ni Musa kele chuo cha Sheria na awandiko ni wana tondolo, Jesu wa Nazareti, mwana wa Josefu.”

⁴⁶ Nathanieli kamuza, “Yadimika kindu chingi chaloli kufuma Nazareti?” Filipo kamuza, “Njuu uone.”

⁴⁷ Jesu aghenda amwona Nathanieli keja, kaghora hung'u ighulu yake, “Mzighaneni, Mwisraeli wa fulo, Amweni kwake sikwesi ndimi ingi.”

⁴⁸ Nathanieli kamkotela, “Wanimanya ije?” Jesu kamuza, “Hambiri Filipo sekupang'ile, ngelo uwo isi ya mtini, Imi nekuonile.”

⁴⁹ Nathanieli kamtumbulila, “Mwalimu, Nuwe Mwana wa Mlungu, Nuwe Mzuri wa Israeli!”

⁵⁰ Jesu kamtumbulila kamuza, “Wadumusa kwa kukala nakuza, nekuonile isi ya mtini. Ujeona malagho mabwaa kuisa agha.”

⁵¹ Naye kawauza, “Fulo namuza mujeona mlunguni kwafunukuka, na malaika wa Mlungu wekejoka na kuselela kwa Mwana wa Mdamu.”