Jakobo 5 - UVORO GHWALOLI KWA WANDU WOSE

Maonyo kwa wazuri

¹ Ndamu nisikizileni inyo wazuri! Lileni na kushighira ighulu ya wasi ghulya ghumujilagha!

² Uzuri ghwenyu ghwaola, na nguo zenyu zalyigho ni viburute.

³ Zahabu na feza zenyu zawato ni kutu, na kutu iyi ni ushuhuda ighulu yenyu, nayo ijelya mili yenyu sa moto. Mwatumbanya uzuri majua agha gha kudua!

⁴ Hata simuwalipile mishahara wandu wadeile kazi mbweni kwenyu. Sikizileni manung'uniko ghawe! Vililo va walye wakwashile viro venyu vafika kele masikilo gha Mlungu, Bwana Mndighi.

⁵ Kukala kwenyu kele urumengu kwajula tamaa za mabwelo. Mwakubandisa kirani kwa ijua lyeshinjo.

⁶ Mwataghanya na kuulagha mundu wa hachi, naye sadeile nganyi nenyo.

Kurumaghia na malombi

⁷ Wana wakwetu, mukale warumaghii hata Bwana eje. Zighaneni selyi mlimi arumaghiagha kedafwa mavalo ghake ghaloli. Wadafurira kwa kurumaghia mvula ya ishika na vuli.

⁸ Nanyose ni suti murumaghie. Mkale na ngolo, kwani ijua lya kuja Bwana lyio avui.

⁹ Wana wakwetu, simwanung'unikilane inyo wenyi simwojetaghanyo ni Mlungu. Mtaghanyi uwo avui mjangoni.

¹⁰ Wana wakwetu, kumbukeni wana tondolo weluo wekeghora izina lya Bwana. Muirime fwana yawe yerumaghia masirimi.

¹¹ Zighaneni, tanawaitagha wandu wa maboelo awa warumaghia. Mwanasikile gha kurumaghia kwa Jobu, nenyo mwamanya selyi kuduweni Bwana amudeilile. Kwani Bwana wana ungi ghwa mbazi na kufwila waya.

¹² Ela ighulu ya ghose wana wakwetu, simwagheme mkeika kilago. Simwagheme na mlunguni ango na msangeni ango kwa kindu chingi. Ghoreni, “Ee” ngera fulo ni Ee na “Hata” ngera fulo ni Hata, nao aho simutaghanyogho ni Mlungu.

¹³ Kuwo na mundungi wenyu esirimagha? Yanamfweni alombe. Kuwo na mundungi ewo na kuboelo? Yanamfweni aimbe nyumbo zekasa.

¹⁴ Kuwo na mundungi wenyu ewo mkongo? Yanafweni awapang'e waghosi wa ikanisa, weje wamlombele na kumuvila mavuta kwa izina lya Bwana.

¹⁵ Malombi ghakalombo kwa idumusi ghemuboesagha mkongo; Bwana ujemuboesa, na kumfwila waya kaung'a adeile.

¹⁶ Kwa hung'u, mughorerane kaung'a zenyu na mlombelane, eri muboeso. Ilombi lya mundu wa hachi lyana ndighi iketi.

¹⁷ Elija oluo mdamu sa isi. Kalomba putu putu kamba mvula siyanye, na fulo mvula siinyele kele isanga kwa miaka mitatu na mezi mitandatu.

¹⁸ Nao kalomba sena, na mvula ikanya kufuma mlunguni na ikadea isanga lyivale mavalo ghake.

¹⁹ Wana wakwetu, ilyi mundungi wenyu alaghaya kwa kusigha ngila ya fulo na mumoju wenyu amuuje sena,

²⁰ manyeni kamba: uyo wose emughalulagha mkaung'a kufuma kele ngila yake ya makosa, ukizagha roho ya ulya mkaung'a kufuma kifweni, na kuleta kufwilo waya kaung'a nyingi.