Jakobo 4 - UVORO GHWALOLI KWA WANDU WOSE

Ugheni na urumengu

¹ Kondo na marashano ghati yenyu ghafuma hiyo? Ghafuma kele tamaa zenyu ziwase zilwanagha ngelo zose amweni kwenyu.

² Mwanashaile vindu simwodimagha kupata, kwa hung'u mwaulagha; muo na tamaa mbwaa ya vindu, ela simudimagha kuvipata, kwa hung'u mwarashana na kuhusana. Simupatagha vindu mushaile, kwa kukala simuvilombagha kwa Mlungu.

³ Na ngelo mwavilomba simuvipatagha, kwa kukala mwavilomba kwa nia iwase; mwalomba vindu muvitumie kwa tamaa zenyu.

⁴ Inyo wandu simodumusilike! Simuweni kamba kukala mgheni wa urumengu ni kukala mumaiza kwa Mlungu? Uyo wose ashaile kukala mgheni wa urumengu wakudea mwenyi kukala mumaiza wa Mlungu.

⁵ Simwaririkanye kamba sikuwesi fulo kele Mawandiko gha Kuela ghaghoragha, “Mlungu wana iziso ighulu ya roho angizile amweni kwetu.”

⁶ Ela mbazi tihawogho ni Mlungu ni mbwaa. Kwa hung'u Mawandiko gha Kuela ghaghora, “Mlungu uwo kinyume cha wandu wakukasile, ela wanawahawagha mbazi wandu wekuselezagha.”

⁷ Kwa hung'u, kuselezeni inyo wenyi kwa Mlungu. Mulwane na Shetani, naye ujemkimbila.

⁸ Msughutileni Mlungu, naye ujemsughutila. Oghesheni mikonu yenyu, inyo wakaung'a! Eleseni ngolo zenyu inyo wandu wa ngolo mbili.

⁹ Furuseni, lileni, na kushighira; ghaluleni seko zenyu zikale kililo na maboelo ghenyu ghakale furuse!

¹⁰ Kuselezeni hambiri ya Bwana, naye ujemjosa.

Maonyo ighulu ya kutaghanya wana wakwetu

¹¹ Wana wakwetu, simwaghorane laghelaghe inyo wenyi. Uyo wose emughoragha wakwawe laghelaghe ango emutaghanyagha, waghora laghelaghe kele sheria, na waitaghanya. Ilyi waitaghanya sheria, aho ndamu suo mwati wa sheria, ela nuwe mtaghanyi.

¹² Ni Mlungu keng'weri afunya sheria na mtaghanyi. Niye tu edimagha kukiza na kuhakila. Ndamu uwe nuwe ani hata umutaghanye mumbenyu?

Maonyo ighulu ya kukukasa

¹³ Ndamu nisikizileni inyo mughambagha, “Lelo ango ikesho tighendagha kele muzi ghumoju, tikale alye mwaka ghumojori tikedea biashara na kupata faida mbwaa.”

¹⁴ Nenyo hata simumanyile umana ghwenyu ghukalagha ije ikesho! Inyo mondekala sa dyara ionekagha kwa ngelo na kulaghaya.

¹⁵ Ela yanafweni mughore hung'u: “Ilyi Bwana ashaya tijekala moyo na kudea ilyi ango lyilya.”

¹⁶ Ela ndamu mwondekukasa na kukukuma: kukukasa uku kose ni kwa laghelaghe.

¹⁷ Kwa hung'u, mundu aweni ghaloli ghedea na kulemo ni kughadea, kwake uyo ni kaung'a.