Jakobo 3 - UVORO GHWALOLI KWA WANDU WOSE

Lumi

¹ Wana wakwetu, simwakale walimu wengi, kwani mwamanya isi walimu tijetaghanyo kuisa wazima.

² Isi itose tadea makosa kengi. Na ngera mundu sedeagha makosa kwa kughora uwo kamili, naye wadima kughumanzira muli ghwake ghose.

³ Tangiza mikowa kele mlomu ghwa farasi eri idee selyi tishaile na taidea ighende andu tishaile.

⁴ Zighana meli selyi ziwo mbwaa, na zighenzogho ni mbeo mbwaa, nazo zaghalulo kwa sukani njache, na kughenda andu nahoza ashaile kughenda.

⁵ Niko kwenyi na lumi, ni mchache kele muli, ela ghwanakukasagha na malagho mabwaa. Hebu ririkanya selyi moto mchache ghuishagha musutu mubwaa!

⁶ Lumi ni sa moto ghujule malaghelaghe mengi, nagho ghuo kele mili yetu, na ghwaeresa ulaghelaghe kele mili yetu. Ghwawasha moto umana ghwetu ghose kwa moto ghufumagha Jehanamu.

⁷ Mdamu wadima kufuga na wafuga nyamandu, nyonyi, nyoka na makumba.

⁸ Ela sikwesi mundungi adimile kufuga lumi. Ni kindu cha laghelaghe, sichedimagha kumanziro na chio na usungu ghoulagha.

⁹ Kwa lumi tamukasa Bwana na Aba, na kwa lumi nakose tawanyiza wadamu wambetu waumbilo kwa fwana ya Mlungu.

¹⁰ Kele mlomu ghulya ghwenyi kwafuma mibaraka na mawanyizo. Wana wakwetu, siifweni ikale hung'u!

¹¹ Ndoo mojori siyifunyagha meji ghasingile na meji ghabile andu kumojori.

¹² Wana wakwetu, Ado mtini ghwadima kuvala zeituni? Ango mzabibu ghwadima kuvala tini? Hata ndoo ya meji gha kisherere siidimagha kufunya meji ghasingile.

Suku kufuma kwa Mlungu

¹³ Nani kwenyu ewo na suku na akili? Yanamfweni aonyeze kwa mghendo ghwake ghwaloli, kwa madeo ghake ghaloli ghedeogho kwa umbole na suku.

¹⁴ Ela ngera ngolo zenyu ziwo na iziso, kubiya na kukuona, simwakukase na kukala wandimi ighulu ya fulo.

¹⁵ Suku seyo siifumagha mlunguni, ela ni ya kiurumengu, siyewo ya kiroho na ni ya kishetani.

¹⁶ Andu kuwo iziso na kukuona, kuwo na kulegha kusikilana na kila mbari ya ulaghelaghe.

¹⁷ Ela suku ifumagha ighulu, jako yanaelile; sena yana sere, umbole na ugheni; yanajule mbazi na yavala mavalo gha madeo ghaloli; siiwesi kimenya na ngolo mbili.

¹⁸ Na hachi ni mavalo ghevalogho ni mbeu ziwandogho kele sere ni wadei sere.