Jakobo 2 - UVORO GHWALOLI KWA WANDU WOSE

Kuwadeila wandu wose karakara.

¹ Wana wakwetu, sa wandu mumudumuse Bwana wetu Jesu Kristo, Bwana wa ubwaa, simwawasaghule wandu.

² Ngera mzuri eja kele ikoghano arwere ngome ya zahabu na nguo zaloli, na mkiwa naese eja arwere nguo za mirafu.

³ Ilyi mwaonyeza ishima kwa ulya arwara kirani na kumuza, “Kala kele ichi kifumbi chaloli,” ela mumuze ulya mkiwa, “Kala kimusi alye, ango kala aha msangeni kavui na maghulu ghangu,”

⁴ aho simwasaghula inyo wenyi na kutaghanya kufumanyagha na maririkanyo ghawase?

⁵ Wana wakwetu washayo, sikizileni! Mlungu wanawasaghule wakiwa wa ughu urumengu kukala wazuri wa idumusi na wapati uzuri ghulya alagile kuwahawa walye wose wamushaile.

⁶ Ela inyo mwalemo ni kuwahawa wakiwa ishima. Ni wana ani wamusirimisa na kumghenza kwa wataghanyi? Ni wazuri!

⁷ Niwo wenyi waghoragha laghelaghe ighulu ya lyilya izina lyaloli muhawilo.

⁸ Ngera fulo mwowatile ilya Sheria ya Kizuri kuirimana na Mawandiko gha kuela selyi ghaghora, “Umshaye mumbenyu sa ilyi ukushaile uwe mwenyi,” mwadea kirani.

⁹ Ela ilyi mwawadeila wandu kuirimana na kuonekana kwa shighati, mwadea kaung'a na mwataghanyo ni sheria kukala wakosa.

¹⁰ Uyo wose evunjagha sheria mojori, wadea makosa ghevunja sheria zose.

¹¹ Uyu aghorire, “Swazinge,” niye mwenyi aghorire, “Swaulaghe.” Hata ngera sani suzingile na waulagha, wakala muvunji wa sheria.

¹² Mghore na mdee sa wandu mjetaghanyo kwa sheria ilya itideile kukala huru.

¹³ Kwani Mlungu sejekala na mbazi na mundu sewesi mbazi. Ela mbazi ijesima utaghanyo.

Idumusi na madeo

¹⁴ Wana wakwetu, kuo na faida muni mundu kughora nio na idumusi na madeo ghake sigheonyezagha? Idumusi lyilya lyadima kumukiza?

¹⁵ Tighore kuo na wakwetu wa walume ango wa wake ashaile nguo na sewesi chakulya.

¹⁶ Kuo na kirani muni kwa inyo kuwauza, “Mlungu amubarikie! Mubughawe moto na mghute!” Ikakala simwowahawile kindu chingi cha wavishaile?

¹⁷ Kwa hung'u, idumusi lyo lyenyi ikakala silyewesi madeo, lyanafwile.

¹⁸ Ela mundu mumoju ujeghora, “Uwe wana idumusi na Imi nana madeo.” Nionyeze idumusi lyako sikowesi madeo na imi nikuonyeze idumusi lyangu kwa madeo.

¹⁹ Uwe wadumusa kamba Mlungu ni mumojori? Ni kirani! Hata na mashetani naghose ghadumusa na kugaganika kwa wogha.

²⁰ Mpumbavu uwe! Wanashaile kuwonyezo kamba idumusi silyeo na madeo silyifweni kindu chingi?

²¹ Ado aba wetu Abrahamu wanapatile hachi ije? Kwa ngila ya madeo, aghenda amufunya sadaka mwana wake Isaki kele mazabahu.

²² Waonaba? Idumusi lyake na madeo ghake vikadea kazi ngila mojori, idumusi lyikakatiso kwa madeo ghake.

²³ Mawandiko gha Kuela ghakakatila, gheghoragha, “Abrahamu kamudumusa Mlungu na kwa undu ghwa idumusi lyake Mlungu kamudumusila kukala na hachi.” Kwa undu ughu Abrahamu kaito mgheni wa Mlungu.

²⁴ Ndamu, waona, kamba mundu wadeo kukala na hachi na Mlungu kwa ngila ya madeo, na si kwa idumusi keng'weri.

²⁵ Niko kwenyi yeluo kwa kijimbo Rahabu, kadeo kukala na hachi na Mlungu kwa madeo ghake ghewahokera wapelelezi wa Waisraeli na kuwawarura wafume kwa ngila nzima.

²⁶ Kwa hung'u, selyi kwenyi muli sighowesi roho ghwafwa, ni ukwenyi na idumusi silyewesi madeo lyafwa.