Jakobo 1 - UVORO GHWALOLI KWA WANDU WOSE

¹ Imi Jakobo, mtumishi wa Mlungu na wa Bwana Jesu Kristo, namwandikila inyo wandu wa mbari ikumi na mbili msaghasike urumenguni. Namuroghowa.

Idumusi na suku

² Wana wakwetu, kaleni na maboelo ngelo mujilogho ni matimo gha kila mbari.

³ Kwani mwamanya kamba ilyi idumusi lyenyu lyasima matimo sa agha, mwamanga.

⁴ Manyeni kamba kurumaghia kwenyu kukale kuketi, eri mkale mufweni na kamili, simogotuagha kindu chingi.

⁵ Ela ngera mundungi wenyu agotuwilo ni suku, alombe Mlungu, naye ujemhawa; kwa kukala Mlungu wanawahawagha wose kwa ungi na kwa ishima.

⁶ Ela kelomba ni suti adumuse na sakale na ngera ingi. Kwani mundu wa ngera ondekala sa muvo ghwa bahari ghusindikogho na kukumbo noko ni mbeo.

^7-8 Mundu sa uyo wa ngolo mbili na semangagha kele malagho ghake ghose, saghelele upatagha kindu chingi kwa Bwana.

Ukiwa na uzuri

⁹ Wakwetu ewo mkiwa yanafweni aboelo ngelo Mlungu emujosagha,

¹⁰ naye ewo mzuri yanafweni aboelo ngelo Mlungu emuselezagha. Kwani mzuri ujeita noko sa kilua cha isakeni.

¹¹ Kwani ijua lyafuma na mruke ghwake ghubile ghwaisha isaka, navo viluwa vake vapotoka na uloli ghwake ghwahakilika. Niko kwenyi na mzuri ejehaitiso kele kazi zake.

Matimo

¹² Uwo baha mundu etulagha mudumusiliki ngelo ya matimo, kwani ilyi asima matimo ujepata kofia ya umana Mlungu alagile kuwahawa walye wamushaile.

¹³ Ilyi mundu atimo saghore, “Nendetimo ni Mlungu.” Kwani Mlungu sedimagha kutimo ni ulaghelaghe, naye mwenyi satimagha mundungi.

¹⁴ Ela mundu watimo ngelo aruto na kuwato ni tamaa zake ziwase.

¹⁵ Nao tamaa yake iwase ikangiza kifu yavala kaung'a; nayo kaung'a ilyi yazegua yavala kifwa.

¹⁶ Wana wakwetu, simwaembo!

¹⁷ Kila kindu chaloli na inosi lyiketi lyanafumagha mlunguni, lyaselela kufuma kwa Aba, muumbi wa milangazi ya mlunguni, naye saghalukagha ango kuleta kiza kwa kughaluka.

¹⁸ Naye kwa kushaya kwake kativala kwa ilagho lyake lya fulo, eri tipate kukala sa mavalo gha hambiri gha viumbo vake.

Kusikila na kudea

¹⁹ Wana wakwetu washayo, kumbukeni agha! Kila mundu akale wa shashowa kusikila, ela akale wa mbole kughora na wa mbole kuwasilo.

²⁰ Kwani hare ya mdamu siidimagha kudea hachi ya Mlungu.

²¹ Kwa hung'u, tagheni ghose ghaluwe na ulaghelaghe ghose, mukuseleze kwa Mlungu na kuwata ilagho lyiwandilo ngoloni kwenyu, lyidimagha kumukiza.

²² Simwakuembeembe inyo wenyi kwa kusikizila ilagho lyake; ela mukale wadei wa ilagho.

²³ Kwani uyo wose esikilagha ilagho ela selyideagha, ondekala sa mundu akuzighana mwenyi kele kilole na akuone selyi afweni.

²⁴ Wakuzighana mwenyi na aghende ngila zake, na waluwala shwa ng'ori selyi afweni.

²⁵ Ela uyo wose ezighana kirani sheria ya fulo ideagha wandu huru, na kuiwata putu, na saisikilagha tu na kuiluwala, ela waidea, uyo mundu ujebarikio ni Mlungu kwa agho edeagha.

²⁶ Ngera mundungi akughelela ni mundu wa dini, ela semanziragha lumi lwake, dini yake siifweni kindu chingi, naye ondekuemba mwenyi.

²⁷ Dini ya fulo ielile imuboelagha Mlungu Aba ni iyi: Kughenda kuwawarura wanake wakiwa na wake wafwililo ni walume wawe kele kusirima kwawe na kukuika uwe mwenyi uelile na urumengu.