2 Wathesaloke 3 - UVORO GHWALOLI KWA WANDU WOSE

Mtilombele

¹ Kuduweni, wana wakwetu, mutilombele, eri Ilagho lya Bwana lyiere kila andu na kuhokero kwa ishima selyi lyihokero kwenyu.

² Na sena mlombe Mlungu atikize na wandu wa laghelaghe na wawase, kwani si wose weo na idumusi.

³ Ela Bwana ni mdumusiliki, naye ujemumangisa na kumlinda na ulya Mlaghelaghe.

⁴ Bwana watihawa kumudumusa inyo, na tadumusa kamba mudeagha na mjedea agha timughorere.

⁵ Bwana alongoze ngolo zenyu kele kumshaya Mlungu na kurumaghia kuletogho ni Kristo.

Kudea kazi ni suti

⁶ Wana wakwetu, tendemuza kwa izina lya Bwana wetu Jesu Kristo, simwakalanye na wana wakwetu wose weo waghadi na siwewatagha agha malagho timughorere.

⁷ Inyo wenyi mwamanya kamba ni suti mudee selyi teluo tikedea. Isi siteluo waghadi ngelo tekezanye.

⁸ Isi siteluo tikelya chakulya cha mundungi sitelipile. Teluo tikedea kazi kwa rughudi na chadi kiro na msenya, eri sitamtukise msigo mundungi wenyu.

⁹ Tanadeile hung'u, si kwa kukala sitiwesi hachi ingi yewaruro ninyo, ela ni timuhawe mfwano ghoirima.

¹⁰ Ngelo tekezanye teluo tikemuza, “Mundu uwo wose seshaile kudea kazi, salye.”

¹¹ Taghora hung'u kwa kukala tasikila kamba wandu wamoju wenyu ni waghadi, siwadeagha kazi ingi, kazi yawe ni kukungiza kele malagho gha wandu wazima.

¹² Kwa izina lya Bwana Jesu Kristo tendewauza na kuwaonya awa wandu waghende kirani na wadee kazi yewapatila ivi wejeshaya.

¹³ Ela kwa inyo wana wakwetu, simwasilo ni ndighi zedea ghaloli.

¹⁴ Ela ikakala mundungi sesikilagha malagho ghetu gheo kele iyi barua, mumumanye na simwakale na ngaro naye hata afwishike waya.

¹⁵ Ela simwamudee sa mumaiza, lyifweni ni kumuonya sa wakwenyu.

Malagho gha kudua

¹⁶ Ndamu Bwana mwenyi uyu ewo mleti sere, amuhawe sere yake kila ngelo na kwa kila ngila. Bwana akale nenyo inyose.

¹⁷ Nawandika kwa mkonu ghwangu agha maroghoi, imi, Paulo. Hung'u niko ningizagha sahii kele kila barua niwandikagha.

¹⁸ Mbazi ya Bwana wetu Jesu Kristo ikale nenyo inyose.