2 Wathesaloke 2 - UVORO GHWALOLI KWA WANDU WOSE

Ulya Mlaghelaghe

¹ Ndamu kwa malagho gha kuja kwake Bwana wetu Jesu Kristo na gha kukoghanyika kwetu ngila mojori kukala naye, tendemlomba wana wakwetu;

² simwakambo ni chongo ango simwaturukie ighulu ya agho gheghorogho kamba Ijua lya Bwana lyeja. Siikosagha kughorogho kamba nisi titondole ango tighorire ango tiwandike barua.

³ Mundungi samkalile kwa ngila ingi. Kwani Ijua ilyo silyikujagha mpaka kuje ghulya ulaghelaghe na ulya Mlaghelaghe aoneka, uyu ataghanyo kuhaitiso.

⁴ Uyu ujekala kinyume cha kila kindu chionogho kukala mlungu ango chidimagha kutaso, naye ujekudea mubwaa wa vose. Hata ughendagha akale kele hekalu ya Mlungu na kukudea Mlungu.

⁵ Ado, simukumbukagha kamba nanamghorerere agha ilyi teluwanyo nenyo?

⁶ Nenyo mwamanya ndamu icho chimwimagha, eri eje aonekane kwa ngelo yake.

⁷ Kwani ndighi za ulaghelaghe zivisike zio zikedea kazi, ela agha ghekalagha, sighekalagha, mpaka uyu eghaimagha aukiso.

⁸ Nao ulya Mlaghelaghe ujeoneka, ela Bwana Jesu keja, ujemulagha na mruke ghwa mlomu ghwake na kumuhaitisa kwa kung'alang'ala kwake keja.

⁹ Nako kuja kwake ulya Mlaghelaghe kukalagha na ndighi za Shetani na kujekala na mwakilimbita na mashiniko gha ndimi,

¹⁰ ketumia kila mbari ya ndimi kwa walye wehaitagha. Wehaitagha kwa kukala siwahokere na kuishaya fulo eri wakizo.

¹¹ Kwa hung'u, Mlungu uwaikagha isi ya ndighi zehaita, wadumuse ndimi,

¹² eri walye wose siwedumusagha fulo, ela waboelo ni kaung'a, wejetaghanyo

Mwanasaghulo kwa ukizi

¹³ Ni suti timhawe Mlungu asanta ngelo zose kwa undu ghwenyu wana wakwetu mushailo ni Bwana. Kwani Mlungu wanamsaghule kukala wa hambiri wekila, kwa ndighi za Roho, kamudea wandu wa kuela wa Mlungu kwa idumusi lya fulo.

¹⁴ Mlungu wanampang'ilile agha kwa ngila ya Ilagho Lyaloli timuchilile, eri mupate ubwaa ghwa Bwana wetu Jesu Kristo.

¹⁵ Kwa hung'u wana wakwetu, mumange na muwate ghalye gha fulo timufundise, kwa kughora ango kwa barua.

¹⁶ Ndamu Bwana wetu Jesu Kristo mwenyi na Mlungu Aba uyu etishaile, na kwa mbazi yake, katihawa kusaruwa kwa kale na kale na ikosereo lyaloli,

¹⁷ ajuzile kumusarusa ngolo zenyu na kumumangisa kele kudea na kughora ghaloli.