2 Wakorintho 9 - UVORO GHWALOLI KWA WANDU WOSE

Uwaruro kwa Wakristo

¹ Ndamu kwa undu ghwa uwaruri ghwa wandu wa Mlungu siinifweni nimwandikile.

² Kwani namanya moluo mukeshaya kuwarura, nemi neluo nikekukasa kwa undu ghwenyu kwa wandu wa Makedonia, nikeghora kamba wakristo wa Akaya wanakuikile kirani kufuma mwaka ghwadua, na chadi chenyu chikawakumba ngolo.

³ Ela nendetuma wana wakwetu eri kukukasa kwetu kwa undu ghwenyu kwa ilagho ilyi sikwakale kutuu, hung'u ni kughora mukuboese selyi kwenyi nighorire;

⁴ eri ilyi nejanya na wandu wa Makedonia na timudoke simokuikile kirani, tifwishikagha waya isi, sigha inyo, kwa kukala tanakukasile nenyo.

⁵ Kwa hung'u, neonile ni kirani nitume awa wana wakwetu kihambiri, weje waike kirani manosi molagile. Nanashaile ghaiko kirani sa manosi ghafunyilo kwa kushaya na si kwa kufungunyizilo.

⁶ Mkumbuke kamba uyu ewandagha kwa uchache ukwashagha uchache na uyu ewandagha kwa ungi ukwashagha ungi.

⁷ Kila mundu afunye selyi eonagha ngoloni kwake, si kwa selyi seshaile ango kwa kufunganyizilo, kwani Mlungu wanashaile uyu efunyagha kwa ngolo ya maboelo.

⁸ Naye Mlungu wadima kumhawa vingi ya vilya mushaile, eri mudime kila ngelo kukala na vindu vingi kwa undu ghwa kila kazi yaloli.

⁹ Selyi Mawandiko gha Kuela ghaghora, “Iye wahawana kwa ishima, wawahawa wakiwa; hachi yake yatula kwa kale na kale.”

¹⁰ Naye Mlungu uyu amuhawagha mwandi mbeu na chakulya chake, ujemuhawa na kumujuzila, nazo zijemuvalila mvono mungi ghwa hachi yenyu.

¹¹ Naye ujemudea mkale wazuri kwa kila kindu, kamba Mlungu akaso ni wandu wengi, kwa manosi ghenyu, wepatagha kufuma kwetu.

¹² Kwani utumishi ughu mudeagha si ghowapatila wandu wa Mlungu ivi washaile tu, ela ghwadea wandu wengi kumuhawa Mlungu asanta.

¹³ Kwa undu ghwa kukatiso ughu utumishi, wengi wemuhawagha Mlungu ubwaa kwa udumusiliki ghwenyu kele Injili ya Kristo muichilagha; na kwa ishima lya manosi ghenyu mwasaranya nawo na wandu wose.

¹⁴ Na kwa hung'u kwa undu ghwa mashayo wamulombela, kwa kukala Mlungu waonyeza mbazi ichumbagha kwenyu.

¹⁵ Timuhawe Mlungu asanta kwa inosi lyake silyeghorekagha!