2 Wakorintho 8 - UVORO GHWALOLI KWA WANDU WOSE

Kufunya kwa Wakristo

¹ Wana wakwetu, tanashaile mumanye ilya mbazi ya Mlungu iwonyezo ni makanisa gha Makedonia.

² Kwani kele matimo mengi na kusirima, ungi ghwa mabwelo ghwawe na ukiwa, ghukakala uzuri kwa ishima lyawe.

³ Fulo nendemghorera kamba kwa udimo ghwawe, na hata kuchumba udimo ghwawe wanafunyile kwa ngolo yawe wenyi,

⁴ wakatilomba na ndighi kwa kutingolangola wapate ulalo ghokala wamoju wewarura wandu wa Mlungu.

⁵ Nawo wakadea hung'u, na si selyi teluo na kuelelia, ela jako wekufunyile wenyi kwa Bwana na kwetu, kwa undu ghwa mashayo gha Mlungu.

⁶ Kwa undu ughu tanamuzile Tito aikatise kazi iyi yaloli ghati yenyu selyi kwenyi aidyowile.

⁷ Ndamu kwa kukala muo na kila kindu; idumusi, maghori, kumanya; na muo na beha yewarura na mashayo kwetu; juloni iyi kazi yaloli nayose.

⁸ Sikughamba nendefunya mlomu, ela ni kwa kuonyeza beha yewarura wazima weo nayo; nendetima kuona selyi fulo mashayo ghenyu gheo.

⁹ Kwani mwamanya mbazi yeluo na Bwana wetu Jesu Kristo; iye oluo ni mzuri, kakudea kukala mkiwa kwa undu ghwenyu, eri inyo mkale wazuri kwa ukiwa ghwake.

¹⁰ Imi maoni ghangu ni agha: Yanafweni mkatise ghalye modyowile mwaka ghwadua, kwa kukala ninyo moluo wa hambiri.

¹¹ Ndamu mumalile iyo kazi, kwa kukala selyi kwenyi moikile na moshaile, ideeni kwa udimo ghwenyu muo nagho.

¹² Ikakala muo na ngolo yefunya, Mlungu udumusilagha manosi ghenyu kuirimana na icho muo nacho si chilya simowesi.

¹³ Si kughamba wazima wewarurikagha nenyo muharisike ela inyose mkale karakara.

¹⁴ Kwa indakwenyi ungi ghwenyu ghuwajuzile kugotua kwawe kamba nawose ungi ghwawe ghujuzile kugotua kwenyu, eri kukale na kukatana.

¹⁵ Kwani Mawandiko gha Kuela ghaghora, “Uyu atumbanye vingi vichumbile seluo na vingi na uyu atumbanye vichache sagotuwilo.”

Tito na wambawe

¹⁶ Namkasa Mlungu kwa kumuhawa Tito ngolo ya beha yemwarura iyi tio nayo.

¹⁷ Kwani sadumusile malombi ghetu ukwenyi, ela iye mwenyi uwo na beha yeja kwenyu kwa kushaya kwake.

¹⁸ Timutumanyagha na wakwetu mumoju akumogho kele makanisa ghose kwa machilo ghake gha Injili.

¹⁹ Na si hung'u tu, ela niye asaghulo ni makanisa kutambanya nesi kele utumishi ughu tideagha kwa undu ghwa ubwaa ghwa Bwana mwenyi na kuonyeza gha ngolo yetu yaloli yewarura.

²⁰ Tanashaile mundungi satinung'unikile kwa selyi titumiagha manosi agha gha ishima.

²¹ Kindu tishaile ni kudea gha hachi si hambiri ya Bwana tu, ela na hambiri ya wandu.

²² Kwa hung'u timutumagha wakwetu mumoju ngila mojori nawo, iye ngelo nyingi tamutima na kumuona kukala wana beha yewarura, na indakwenyi uwo na beha kuchumba kwa kukala uo na idumusi nenyo.

²³ Kwa undu ghwa Tito, iye ni mumbetu na mdei kazi ngila mojori nemi kwa undu ghwenyu; na kwa undu ghwa wana wakwetu walye wazima, wo ni watumo wefumagha kele makanisa, nawo ni ubwaa ghwa Kristo.

²⁴ Kwa hung'u onyezeni hambiri ya makanisa mashayo ghenyu na kukukasa kwetu ighulu yenyu kwa awa wandu.