2 Wakorintho 7 - UVORO GHWALOLI KWA WANDU WOSE

¹ Washayo kwa kukala tana vilago sevi, tikuelese kufuma kele vose vidimagha kuluwisa muli na roho, na tikale waeli kamare, tikekala kele kumwogha Mlungu.

Mabwelo gha Paulo

² Tirughurireni ulalo kele ngolo zenyu! Sitimudeilile mundungi laghelaghe, sitimuhakile mundungi hata sitipatile kindu chingi kwa kumusowesa mundungi.

³ Si kughamba nendeghora hung'u kwa kumutaghanya; namalila kumughorera kukala muo ngoloni kwetu, tio tiwatane ngelo ya kifwa na ngelo tio moyo.

⁴ Nio na idumusi nenyo; nakukasa nenyo. Napata usarusi kele masirimi ghangu ghose na mabwelo na ndighi.

⁵ Kwani tighenda tifika Makedonia, sitipatile kuzumua kungi, ela gasi zose tanatiriro; shighati koluo na marashano na amweni kwetu koluo na wogha.

⁶ Ela Mlungu uyu asarusagha awa wafwa ngolo, katihawa ngolo kwa kuja kwake Tito.

⁷ Si kuja kwake kwenyi tu, ela ni kwa iye kukumbo ngolo ninyo. Iye wanatighorere agha mukosereagha, agha mulililagha, chadi chenyu ighulu yangu, kwa hung'u nikaboelo na ndighi.

⁸ Kwani hata ngera sani nimwasilile kwa barua, silombagha kufwilo waya kungi hata ikanakale siyeluo yaloli ingi. Namanya ilya barua yanamwasilile, ima kwa ngelo njache.

⁹ Ndamu nio na kuboelo, si kwa kukala mwanawasililo kungi, ela kwa kuwasilo kwenyu mwanarihire. Kuwasilo uku kondeleto ni Mlungu na kwa hung'u sitimusirimise.

¹⁰ Kwani kulya kuwasilo kwenyu kushayogho ni Mlungu, kwanaletagha kuriha kulya kuletagha ukizi, na sikukalagha na nambee nikamanya; ela kuwasilo kwa urumengu, kwanaletagha kifwa.

¹¹ Inyo mwaona selyi kuhariso kwa ngila ya Mlungu kuo, Lola kwamdea mkale na chadi, mukukotele, mkale na wogha, mkoseree, mfunge ndighi, mukutaghanye mkeshaya hachi ideike. Kele ghose agha simwaoneke kukala na makosa.

¹² Kwa hung'u, hata ngera sani nanamwandikile barua ilya, siwandike kwa undu ghwa mundu adeile laghelaghe ango kwa mundu adeililo laghelaghe, ela ni eri beha yenyu kwa undu ghwetu ioneke hambiri ya Mlungu.

¹³ Kwa hung'u takumbo ngolo kwa undu ughu. Ela ngila mojori na kusaruso ngolo kwetu, tanaboelelo na ndighi kwa mabwelo atihawile Tito, kwa kukala inyose mwanaisaruse ngolo yake.

¹⁴ Kwa kukala ngera nimukasile inyo kwake, sifwishike waya, ela kwa kukala tanaghorire fulo kwenyu, aho kukukasa kwetu hambiri ya Tito kukakala kwa fulo.

¹⁵ Kwa hung'u mashayo ghake kwenyu ni mengi, ngelo ekumbukagha kusikila kwenyu, na selyi inyose mumuhokere kwa wogha na kugaganika.

¹⁶ Nio na kuboelo kwa kukala nio na idumusi nenyo.