2 Wakorintho 6 - UVORO GHWALOLI KWA WANDU WOSE

¹ Ndamu isi sa wadei kazi ngila mojori na Mlungu, tendemvoya inyo mpatile mbazi ya Mlungu simwaihakile bule.

² Kwani Mlungu waghora: “Kele ngelo ifweni nekusikile, Kele ngelo ya ukizi nekuwarure.” Zighana! Ndamu niyo ngelo ifweni, zighana lelo nilyo ijua lya ukizi.

³ Sitimwikilagha mundungi kindu chemukwalisa, eri kazi yetu siyaoneke na makosa ghengi.

⁴ Ela isi sa watumishi wa Mlungu taonyeza kwa kila ngila, kurumaghia kwetu kele matiriro, wasi na masirimi.

⁵ Kele kukwito kwetu, kufungo na kudiilo; kwa kudea kazi na ndighi; kwa kusowa haring'a na kusowa chakulya;

⁶ kwa ueli ghwetu na kumanya kwetu, kwa kurumaghia na ngolo yaloli, kwa undu ghwa Roho wa Kuela, na mashayo gha fulo.

⁷ Tikeghora ilya fulo, kwa undu ghwa ndighi za Mlungu ngila mojori na mata za hachi kele mkonu ghwa kijo na ghwa kimosho.

⁸ Kele kuhawo ishima na kumenyeso, kele kughoro laghelaghe na kughoro kirani. Tatalo sa waghori ndimi, ela nisi waghori fulo;

⁹ tio sa wandu siwemanyikane, ela wamanyikane kwa wandu wose, tio sa wandu wafwile, ela tio moyo, tio sa wandu wekwitogho, ela siweulaghogho,

¹⁰ tio sa wandu wetirirogho, ela kila ngelo tana maboelo, tio sa wandu wakiwa, ela tawadea wandu wengi kukala wazuri wa mali, tio sa wandu sitewesi kindu chingi, ela tana vindu vose.

¹¹ Wakorintho, Isi taghora mwazi mwazi kwenyu, ngolo zetu zio mwazi.

¹² Gasi yetu ngolo zio mwazi, inyo ninyo mwatirugharira ngolo zenyu.

¹³ Ndamu naghora sa tatio, Rughureni ngolo zenyu nanyose.

Ionyo ighulu ya kuirima gha wandu siweo wa Mlungu

¹⁴ Simwawatane na wandu siwedumuse. Kwani hachi na makosa ghanawatanagha? Mlangazi ghwanawatanagha na kiza?

¹⁵ Kristo udimagha ije kusikilana na Shetani? Uyu adumuse udimagha ije kusikilana na uyu sedumuse?

¹⁶ Hekalu ya Mlungu yadima ije kusikilana na sanamu za wandu siwedumuse? Kwa kukala isi nisi hekalu ya Mlungu ewo moyo selyi kwenyi Mlungu aghora, “Nijekala kwawe na kuselanya nawo; Nijekala Mlungu wawe nawo wejekala wandu wangu.

¹⁷ Kwa hung'u fumeni ghati yawe na mukusaghule, waghamba Bwana, simwawate icho chiluwe; nemi nijemuhokera.

¹⁸ Na nikalagha Aba wenyu nenyo mjekala wana wangu wa kialume na wa kiwake, waghamba Bwana wa Ndighi.”