2 Wakorintho 5 - UVORO GHWALOLI KWA WANDU WOSE

¹ Kwani tamanya kamba ilyi hema yetu ya urumenguni iyi tikalagha yahakilo yaani mili yetu; tana nyumba kwa Mlungu siyewaghalo na mikonu, nyumba ya kale na kale mlunguni.

² Fulo kele iyi hema, taruma, tikeshaya kurwariso makalo gha kufuma mlunguni,

³ kwa kurwariso hung'u sitidokogho watuu.

⁴ Kwani ngelo tio kele hema iyi, taruma kwa kusirima, si kwa kukala tanashaile kughufunya muli; ela ni kwa kukala tanashaile tirwariso muli ghwa mlunguni, eri muli ughu ghwefwa ghumilo ni umana.

⁵ Mlungu niye atiboesagha kwa undu ughu, naye wanatihawile Roho wake akale mfunga ghomangisa agha.

⁶ Kwa hung'u tana ung'oni ngelo zose, tikemanya kamba ngelo zose tio kele makalo agha gha muli tio kulele na Bwana.

⁷ Kwani taghenda kwa idumusi, si kwa kuona kungi.

⁸ Tio na ung'oni na tasaghula tisighane na muli eri tikalanye na Bwana.

⁹ Kwa hung'u hata ngera sani takala aha ango noko, tio na beha yemuboela Iye.

¹⁰ Kwani isose ni suti tionekane mwazi ngelo yemanga kele kifumbi chetaghanya cha Kristo, eri kila mumoju apate ifungu lyake kwa kazi adeile kwa muli ghwake, lyaloli ango lyiwase.

Kupataniso na Mlungu kwa ngila ya Kristo

¹¹ Ndamu kwa kukala tamanya kumwogha Mlungu, tatima kungolangola wandu; ela Mlungu wamanya mwazi selyi tio, na nakoserea nanyose mwamanya ngoloni kwenyu selyi tio.

¹² Si kughamba tendekukasa isi wenyi hambiri yenyu sena, ela tendemuhawa chekukasa ighulu yetu, na mkale na cha kuwatumbulila walye wekukasagha wenyi kidamu na si ngoloni komweni.

¹³ Kwani ngera tio na mutu ni kwa undu ghwa Mlungu na ngera tana akili ni kwa undu ghwenyu.

¹⁴ Kwani mashayo gha Kristo nigho ghatitawalagha, kwa kukala tamanya kamba mumojori wanafwile kwa undu ghwa wose; kwa hung'u wose wanafwile naye.

¹⁵ Iye wanafwile kwa undu ghwa wose, eri walye weo moyo siwakale moyo kwa undu ghwawe ghwenyi, ela kwa undu ghwa Iye afwile na kazuka kwa undu ghwawe.

¹⁶ Kwa hung'u kufuma indakwenyi sititalagha mundungi sena kwa kuonekana kwake. Hata ngera sani ko kale temutalile Kristo kidamu, indakwenyi siko kungi.

¹⁷ Kwa kukala ilyi mundu akala amweni ya Kristo ni iumbo iwishi; va kale vaita, vose vakala viishi.

¹⁸ Agha ghose ghanafumagha kwa Mlungu, uyu atipatanisagha na Iye mwenyi kwa ngila ya Kristo, naye wanatihawile kazi yepatanisa.

¹⁹ Ni kughora kamba Mlungu oluo amweni ya Kristo keghupatanisa urumengu na iye mwenyi; seo na kutala makosa ghawe, naye wanatisighilile ilagho lyepatanisa.

²⁰ Kwa hung'u isi nisi kibalo cha Kristo kwa ngila ya Mlungu kughora kuitila kwetu. Tendemlomba kwa undu ghwa Kristo mpataniso na Mlungu.

²¹ Kristo sadeile kaung'a ingi, ela kwa undu ghwetu Mlungu kamdea akale na kaung'a, eri kwa kuwataniso naye tipate uhachi ghwa Mlungu