2 Wakorintho 4 - UVORO GHWALOLI KWA WANDU WOSE

Mali ya Roho kele nyungu za ulongo

¹ Kwa kukala utumishi ughu tanaghupatile kwa undu ghwa mbazi ya Mlungu sitifwighagha ngolo.

² Taghamenya madeo ghose ghawase gha waya, sitighendagha kwa mikalo ango kuvurugha Ilagho lya Mlungu, ela kwa kughora ilya fulo mwazi takukasa hambiri ya Mlungu kwa kudea kila mundu kumumanya ngoloni.

³ Nao ikakala Injili iyi tiichilagha yaviso, yaviso tu kwa walye welaghaya.

⁴ Mlungu wa ughu urumengu niye awadea kukala vifondo wa akili awa siwedumusagha, eri siwaone mlangazi ghwa Injili ya ubwaa ghwa Kristo, uyu ewo wa ifwani lya Mlungu.

⁵ Kwani isi sitikuchilagha isi wenyi, tamuchila Jesu Kristo kukala Bwana, na isi wenyi kukala nisi wasunyi wenyu kwa undu ghwa Jesu.

⁶ Kwani Mlungu niye aghorire, “Mlangazi ghujelangaza kizeni”, naye walangaza akili zetu kutiletela mlangazi ghomanya ubwaa ghwa Mlungu kele ushu ghwa Kristo.

⁷ Ela isi tio na mali iyi ya kiroho sa nyungu, yaonyeza kamba Mlungu niye ewo na ndighi na si isi.

⁸ Tasirimiso kwa kila ngila, ela sitifwanyilofwanyilo; tapata wasi ghwa ngolo, ela sitifwighagha ngolo;

⁹ tatiriro, ela sitisowagha uwaruri, tadaho tigwe, ela sitiulagho.

¹⁰ Ngelo zose kele muli tatwala kifwa cha Kristo eri umana ghwa Kristo naghose ghuonekane kele mili yetu.

¹¹ Ngelo zose tio moyo tio kifweni kwa undu ghwa Kristo, eri umana ghwa Jesu naghose ghuonekane kele mili yetu yefwa.

¹² Kwa hung'u kifwa chio chikedea kazi kwetu, ela umana ghuo nenyo.

¹³ Mawandiko gha Kuela ghaghora, “Neluo na idumusi kwa hung'u nikaghora,” Isi natose kwa kukala tio na ngolo ilya yenyi ya idumusi taghora;

¹⁴ tikemanya kamba Uyu amzusile Bwana Jesu ujetizusa natose ngila mojori na Jesu na kutiika hambiri yake ngila mojori nenyo.

¹⁵ Malagho agha ghose ni kwa undu ghwenyu eri mbazi ijuzilike kwa kujuzilika kwa mtalo ghwenyu, na makaso ghajule kwa ubwaa ghwa Mlungu.

Kukala Kele idumusi

¹⁶ Kwa undu ughu lyingi sitifwighagha ngolo. Hata ngera sani mili yetu yekuoleni, ela kiroho tendedeo uishi kila ijua.

¹⁷ Kwani matiriro agha ghawanguwe ni gha ngelo tu, ghetipatilagha malagho mabwaa gha ubwaa ghuisagha ghose.

¹⁸ Kwani sitilolagha agha gheonekagha tu, ela talola na ghalye sigheonekagha. Kwani agha gheonekagha ni gha ngelo, ela ghalye sigheonekagha ni gha kale na kale.