2 Wakorintho 2 - UVORO GHWALOLI KWA WANDU WOSE

¹ Kwa hung'u nanaonile seje kwenyu sena na kumuletela furuse.

² Ndamu ilyi namletela inyo furuse nani enideagha niboelo sala ulya mwenyi namufurusisa?

³ Niko nikamwandikila, eri ilyi neja sapato ni wasi kwa walye wenideagha niboelo. Kwani namanya fulo zenyi nikakala na maboelo, inyose mkalagha na maboelo.

⁴ Nanamwandikile nio na furuse na kuhariso ni ngolo nikelila na mbori, si kwa undu ghwa kumusirimisa, ela kwa kumumanyisa mashayo mengi nio nagho kwenyu inyose.

Kufwilo waya kwa mkosa

⁵ Ilyi mundungi amudea mumbawe awasilo, sishaile imi niwasilo, ela watidea itose tiwasilo; sishaile nikale nibile kuchumba.

⁶ Azabu ifunyogho ni wengi wenyu yamukata mundu sa uyo

⁷ Kwa hung'u ni kirani mumufwile waya na kumusarusa, eri sahariso na ndighi na kufwa ngolo.

⁸ Kwa hung'u nendemlomba mkale na mashayo naye.

⁹ Kwa undu ughu nanamwandikile barua; kwa kukala neshaile kutima selyi muwatagha mafundiso ghangu ghose.

¹⁰ Mundu uwo wose mumufwilagha waya, namose nimufwilagha waya. Ngelo yose nafwila waya nafwila waya ghose, Fulo imi sa wa Kristo nafwila waya kwa undu ghwenyu,

¹¹ eri nimukinge Shetani sapate ulalo kwetu; kwani wana mikalo yake.

Wasi ghwa Paulo Troa

¹² Nighenda nifika Troa kuchila Ilagho Lyaloli lya Kristo, mjango ghorughuro ni Bwana kwa kuchila alye.

¹³ Ela nikakala na wasi ngoloni kwa kukala wakwetu Tito simudokile alye. Kwa hung'u nikawalaga wandu nikaghenda Makedonia.

Kusima kwa ngila ya Kristo

¹⁴ Ela namkasa Mlungu, uyu kwa ngila ya kuwataniso na Kristo atihawagha usimi na aeresagha kwa ngila yetu kumumanya Kristo andu kose sa iruke lyaloli.

¹⁵ Kwani isi nisi marumba gha Kristo kwa Mlungu ghesaghisogho kwa walye wekilagha na walye wehaitagha.

¹⁶ Kwani kwa walye wehaitagha ni iruke lya kifwa, ela walye wekilagha ni marashi gha kukala moyo. Ndamu nani edimagha malagho agha?

¹⁷ Kwani isi sitio sa wandu wengi wedeagha zoghori na ilagho lya Mlungu; Isi sa wandu watumilo ni Mlungu tachila kwa ngolo ielile hambiri ya Mlungu kele Kristo.