2 Wakorintho 13 - UVORO GHWALOLI KWA WANDU WOSE

Maonyo gha kudua na maroghoi

¹ Ilyi lyikalagha ni indu lyangu lya katatu lyeja kwenyu. Selyi Mawandiko gha kuela ghaghoragha, “Makosano ghapataniso kwa milomu ya mashahidi waili ango watatu.”

² Nanashaile walye wadeile kaung'a uko hambiri na walye wazima wejedea; nanashaile niwaonye indakwenyi niseo nawo, selyi newaonyile kele charo changu cha kaili, kamba ilyi neja sena, weluonagha.

³ Kwani mwanahadagha kumanya kamba Kristo wanaghoragha nemi: Iye si mnyonge kwenyu kungi, ela wana ndighi ghati yenyu.

⁴ Kwani hata ngera sani wanawambilo kwa unyonge kele msalaba, Iye uwo moyo kwa ndighi za Mlungu. Isi natose tikekala amweni kwake tio wanyonge, ela ngila mojori naye tijekala na ndighi za Mlungu kwa utumishi ghwenyu.

⁵ Kuzighaneni inyo wenyi muone ngera mwanatulagha mukewata idumusi, Kupimeni inyo wenyi. Ado simumanyagha ngera Jesu Kristo uwo amweni kwenyu? Ngera simomanyagha mwagwa.

⁶ Naelelia kamba mwamanya isi sitigwile.

⁷ Isi tamulomba Mlungu kamba simwadee makosa, si eri isi tionekane kukala nisi wasimi kungi, ela ninyo mdee ghaloli hata ngera sani isi tionekagha tagwa.

⁸ Kwani isi sitidimagha kudea kindu chingi kinyume cha fulo, ela tideagha gheo gha fulo.

⁹ Isi tio na kuboelo ngelo tio wanyonge na inyo mwana ndighi. Ilagho tilombagha ninyo mkale mumangile.

¹⁰ Nendewandika hung'u ngelo nio kulele nenyo, eri ngelo neja nisakale nibile kele kutumia udimo nihawilo ni Bwana, udimo ghomuwaghala na sighomufuchula kungi.

¹¹ Na ndamu wana wakwetu, namulaga. Ghololeni mighendo yenyu, wateni ghalye nimuhawile; pataneni na kila mumoju, mkekala na sere. Na Mlungu wa mashayo na sere ujekala nenyo.

¹² Roghowaneni kwa kususugana kwa kuela.

¹³ Wandu wose wa Mlungu wamuroghowa.

¹⁴ Mbazi ya Bwana Jesu Kristo, na mashayo gha Mlungu, na ukezanyo ghwa Roho wa Kuela, vikale nenyo inyose.