2 Wakorintho 10 - UVORO GHWALOLI KWA WANDU WOSE

Paulo kutetela kazi yake

¹ Imi Paulo, namuvoya kwa umbole na kukuseleza kwa Kristo. Imi nio wa mbole ngelo nio nenyo na nanabile ngelo nio kulele nenyo.

² Nendemlomba ngelo tikezanye simwanidee nikale nibile, kwani namanya nadima kukala nibile, kwa walye watiririkanyiragha kamba tanadeagha malagho kiurumengu.

³ Ee ni fulo tanakalagha urumenguni, ela isi sitilwanagha kiurumengu kungi.

⁴ Mata tizitumiagha kulwana si mata ya urumengu kungi, ela ni za ndighi za Mlungu tizitumiagha kuhakila ngome.

⁵ Tahakila nganyi na vitangalilo va kukukasa kose kuo kinyume cha kumumanya Mlungu; na tawata mateka maghelelo ghawe eri ghasikile gha Kristo.

⁶ Nesi tio meso kulyitaghanya ideo silyeo lya kusikila, ilyi kusikila kwenyu kwakatila.

⁷ Inyo mondelola agha gheo hambiri kwenyu. Ngera mundungi akumanya putu kamba iye ni wa Kristo, haya samanye kamba selyi kwenyi ewo wa Kristo, niko kwenyi natose tio wa Kristo.

⁸ Kwani sitifwighagha waya hata ngera sani takukasa na ndighi kwa nguma atihawile Bwana. Nguma atihawile ni yemuwaghala inyo na si yemufuchula kungi.

⁹ Simwaghambe kamba nendeshaya kumturusa na barua zangu.

¹⁰ Kwani wanaghora, “Barua za Paulo zanagwaile na zanabile; ela ngelo ewo ngila mojori nesi ni munyonge na malagho ghake si ilagho lyingi.”

¹¹ Wandu sa awo yanafweni wamanye kamba ghalye tighoragha kele barua ngelo siteo, nigho ghenyi tideagha ngelo teja.

¹² Isi sitidimagha hata kachache kukuika ango kukufwananisa isi wenyi na walye wekukasagha wenyi. Nawo wekekupima wakupima wowenyi na kukufwananisa wowenyi kwa wowenyi na wowenyi siwekumanyagha.

¹³ Ela isi sitikukasagha kuchumba kipimo, sala kwa kipimo Mlungu atiikilile cha kumufikila inyo.

¹⁴ Isi sitichumbagha mwaka ghwetu sa kuzo sitimfikilile; isi nisi teluo wa hambiri kuja kwenyu na injili ya Kristo.

¹⁵ Isi sitikukasagha kuchumba kipimo kwa kazi ya wandu wazima, ela ikosereo lyetu kwenyu ni kamba idumusi lyenyu lyijuzilike na kazi yetu kwenyu kele maka yetu ishabuke.

¹⁶ Nao tichile Ilagho lyaloli kele masanga gheo hambiri yenyu sikweo na kukukasa kwa kukala tadea kazi andu kwa mundu mzima.

¹⁷ Ela na Mawandiko gha Kuela ghaghora, “Uyu ekukasagha akukase kwa undu ghwa Bwana.”

¹⁸ Kwani si mundu ekukasagha mwenyi edumusilogho, ela ni uyu ekasogho ni Bwana.