2 Timotheo 2 - UVORO GHWALOLI KWA WANDU WOSE

Askari mdumusiliki wa Jesu Kristo

¹ Ndamu Mwana wangu, ukale na ndighi kwa mbazi taipata kwa kuwataniso na Kristo Jesu.

² Mafundiso usikile kwangu hambiri ya mashahidi mengi wahawe wandu wadumusilike wawafundise wazima nawose.

³ Sirima ngila mojori na wose, sa askari mdumusiliki wa Kristo Jesu.

⁴ Askari ewo uteni sakalagha na maboelo gha kiraia, kwani lyake ni kumuboela mubwaa wake.

⁵ Mundu osimana kele hako yekimbila sapatagha inosi kakala seirime sheria za hako.

⁶ Mlimi adeagha kazi na ndighi yanamufweni kupata ifungu lya viro va hambiri kukwasho.

⁷ Ririkanya agha nighoragha, kwani Bwana ujekutambulila agha ghose.

⁸ Mukumbuke Jesu Kristo, azukile kufuma kwa wafwa, eluo wa kivali cha Daudi, selyi ifundisogho ni Ilagho Lyaloli nilyichilagha.

⁹ Kwa kukala nachila Ilagho Lyaloli, nasirima na hata kufungo sa mundu akosa. Ela Ilagho lya Mlungu silyifungogho,

¹⁰ na kwa hung'u narumaghia kila kindu kwa undu ghwa wasaghulo wa Mlungu, eri nawose wapate ukizi ghukujagha kwa ngila ya Kristo Jesu, na ghuletagha ubwaa ghwa kale na kale.

¹¹ Maghori agha ni gha fulo: “Ilyi tafwa ngila mojori naye, tikalagha moyo ngila mojori naye sena.

¹² Ilyi tarumaghia, tijetawala ngila mojori naye. Ilyi tamukana, Naese ujetikana.

¹³ Ilyi siteo wadumusiliki, Iye watula ni mdumusiliki, kwani sedimagha kukala mundimi iye mwenyi.”

Mdei kazi waloli

¹⁴ Wakumbuse wandu wako malagho agha, na uwakanye hambiri ya Mlungu siwadee nganyi ighulu ya malagho. Kwani nganyi siiwaruragha kindu chingi, ela yendewahakila wandu wewasikizilagha.

¹⁵ Udee selyi udimagha kumuboela Mlungu, sa mudei kazi sefwishika waya kwa kazi yake, na efundisagha karakara ilagho lya fulo.

¹⁶ Sighana na maheleo gha kiurumengu na gha uzimu, kwani ghwawaghenza wandu kulele, na Mlungu.

¹⁷ Mafundiso ghawe ghendekala selyi kilonda cha gilimi chilyighagha muli. Wandu wafundisa malagho agho ni Humenayo na Fileto.

¹⁸ Wandu awa walaghaya kufuma kele ngila ya fulo na wahakila idumusi lya wandu wadumuse kwa kughora kuzuka kwamalila kuja.

¹⁹ Ela msingi ghuikilo ni Mlungu ghwanamangile na ghwana luvano ughu “Bwana wanaweni wandu walye weo wake,” na “Uwo wose eghoragha ni wake ni suti ataghane na ulaghelaghe.”

²⁰ Kele nyumba mbwaa kwana bakuli na vilambo va kila mbari: na vimoju ni va zahabu na feza, ela vimoju ni vilambo va mbao na va ulongo; vimoju vanatumiogho kele ngelo zake ekeng'weri na vimoju ngelo zose.

²¹ Ilyi mundu akuelesa mwenyi kufuma kele malaghelaghe ghose, utumiogho kele kazi ya ishima, kwa kukala wakufunya putu na wafwana kwa Bwana wake, kutumio kwa kila kazi yaloli.

²² Kwa hung'u kulinde na tamaa za utawana, uwatane na hachi, idumusi, mashayo na sere, ngila mojori na wandu wose wemulombagha Bwana kwa ngolo ielile.

²³ Kulinde na nganyi za uzimu na kipambavu, wanaweni kamba zanaletagha marashano.

²⁴ Mtumishi wa Bwana ni suti sakale mundu wa marashano. Yanafweni akale wa mbole kwa wose, mwalimu waloli na murumaghii,

²⁵ akale eo wa mbole ngelo yeonya wandu. Kwani Mlungu wadima kuwahawa ngelo yeriha na kuimanya fulo.

²⁶ Na aho wawuye kele akili zawe na kufuma kele mtegho ghwa Shetani, uyu awawatile na kuwadea wasikile ghake.