2 Timotheo 1 - UVORO GHWALOLI KWA WANDU WOSE

¹ Imi Paulo mtumo wa Kristo Jesu kwa kushaya kwake Mlungu, uyu anitumile nierese gha umana alagile kutihawa kwa kuwataniso ni Kristo Jesu.

² Nawandika Kwa Timotheo mwana wangu mshayo: Mbazi, kufwilo waya, na sere kufuma kwa Mlungu Aba, na Kristo Jesu Bwana wetu zikale kwako.

Kufunya asanta na kukumba ngolo

³ Namuhawa Mlungu asanta, uyu nimutumikilagha kwa ngolo ielile, selyi wana ake weluo wekedea. Namufunyila asanta ngelo zose nikukumbukagha kele malombi ghangu kiro na msenya.

⁴ Nio na kukumbuka mbori zako, na nanashaile na ndighi nikuone, eri nijule maboelo.

⁵ Nio na kukumbuka idumusi lyako lya fulo, idumusi lyeluo na waiyo Loisi na meo Eunike. Nemi namanya uwo nalyo naose.

⁶ Kwa undu ughu nakukumbusa uike moyo inosi ilyo lya Mlungu uhawilo kwa kuikililo mikonu nimi.

⁷ Kwani ilya Roho atihawile Mlungu siitideagha tikale na wogha, ela ni Roho yetijuza ndighi, mashayo na kukumanzira.

⁸ Kwa hung'u swafwe waya kumushuhudia Bwana wetu, hata na imi mfungo kwa undu ghwa Kristo. Ela dea ifungu lyako kele kusirima kwa undu ghwa Ilagho Lyaloli selyi Mlungu ekuhawagha ndighi.

⁹ Naye Mlungu wanatikizile na kutipang'a tikale wandu wake, si kwa undu ghwa madeo ghetu anduangi, ela ni kwa kushaya na mbazi yake. Wanatihawile mbazi yake kwa ngila ya Kristo Jesu hambiri ya kudyowa kwa ngelo,

¹⁰ ela ndamu yamanyiso kwetu kwa ngila ya kuja Mkizi wetu Kristo Jesu. Iye wasima ndighi za kifwa, na kwa ngila ya Injili kaonyeza umana sighweo na kifwa.

¹¹ Mlungu wananisaghule imi kukala mtumo na mwalimu wa Ilagho Lyaloli,

¹² na ni kwa undu ughu nasirimiso ni malagho agha. Ela nanatulagha na ngolo, kwa kukala nanamuweni uyu nimudumuse, na nio na fulo wadima kuchilinda chilya anihawile hata lyilya Ijua Ibwaa.

¹³ Wata malagho gha fulo ghalye nikufundise, ghakale fwana yeirima na utule kele idumusi na mashayo gheo ghetu kwa kuwataniso na Kristo Jesu.

¹⁴ Lyilinde lyilya inosi lya fulo uhawilo ni Roho wa Kuela uyu akalagha amweni kwetu.

¹⁵ Selyi umanyagha, wandu wose wa Asia wananisighile, wamoju ni Fugelo na Hermogene.

¹⁶ Bwana afwile waya nyumba ya Onesiforo, kwa undu ghwa kunisarusa ngolo mandu mengi. Safwishilo waya ni kufungo kwangu,

¹⁷ ela aghenda afika Roma ukwenyi, wanadyowile kunihada hata kaniona.

¹⁸ Bwana, amfwile waya lyilya Ijua! Uwe wamanya putu malagho ghaloli anideilile alye Efeso.