2 Petro 3 - UVORO GHWALOLI KWA WANDU WOSE

Kilago cha kuja kwa Bwana

¹ Washayo, ndamu iyi ni barua ya kaili nikemwandikila. Kele barua izi mbili natima kughanula maririkanyo gha akili zenyu ghaloli kwa kumkumbusa malagho agha.

² Nanashaile mkumbuke malagho ghalotilo ko kale ni wana tondolo wa kuela na mlomu kufuma kwa Bwana na Mkizi mhawilo ni watumo wenyu.

³ Hambiri ya ghose mtambukilo kamba majua gha kudua kujeoneka wandu wetukogho ni tamaa zawe ziwase. Nawo wejemsholela,

⁴ na kumkotela, “Wanamulagile kamba ukujagha? Ndamu uwo hiyo? Wana aba wanafwile, na malagho ghose ni selyi kwenyi gheluo sikuwesi chingi chaghaluka kufuma kuumbo urumengu.”

⁵ Wandu awa kwa kidali wailegha fulo ighambagha, kamba Mlungu ko kale wanaghorire ghore na mlunguni na isanga vikaumbo. Isanga lyikaumbo kufuma kele meji na kwa meji;

⁶ na yeluo ni kwa meji, meji gherukire, ghalye ghahaitise urumengu ghwa kale.

⁷ Ela mlunguni na isanga vio indakwenyi vendeiko ni ilya ghore yenyi ya Mlungu, eri ghujeisho na moto. Navo vendeiko kwa undu ghwa ijua wandu siwewo wa Mlungu wejetaghanyo na kuhaitiso.

⁸ Ela washayo simwaluwale ilagho imojori. Kwa Bwana sikuwesi uchumbano ghati ya ijua imojori na miaka elfu; kwake vose ni karakara.

⁹ Bwana si kughamba ni womukamuka kukatisa kilago chake selyi wamoju weghelelagha. Ela warumaghianya nenyo, kwa kukala sashaile mundungi ahaitiso, ela wanashaile wose warihe kaung'a zawe.

¹⁰ Ela ijua lya Bwana lyikujagha sa kiting'a. Ijua ilyo, mlunguni kuduagha kwa mururumo mubwaa; vindu va mlunguni vijeiya na kuhaita na urumengu na vose vijeisho.

¹¹ Na kwa kukala vindu ivi vose vijehakilo kwa ngila iyi, yanafweni mukale wandu wafweni ije? Yanafweni mukale wandu wa kuela na mukufunyile kwa Mlungu,

¹² mkedafurira Ijua lya Mlungu na kudea ghose mdimagha kulyidea lyije kafwani. Ijua mlunguni kujeiya na kuhaitiso na vindu va mlunguni vijeyeyuka kwa moto.

¹³ Ela isi tendedafwa ghalye Mlungu atilagile; mlunguni kuishi na isanga iwishi andu uhachi ghukalagha.

¹⁴ Kwa hung'u washayo, ngelo mudafuriragha agha, deeni chadi kukala muelile na simweo na makosa hambiri ya Mlungu na kukala na sere naye.

¹⁵ Muone kurumaghia kwa Bwana kukala ni ulalo emuhawagha mpate kukila, selyi kwenyi wakwetu Paulo amwandikile ketumia suku ahawilo ni Mlungu.

¹⁶ Agha nigho eghoragha kele barua zake zose kele ilagho ilyi. Kuwo na malagho ghakulile kele barua zake ghaghalulogho ni wandu wapambavu na wa kisha, selyi wadeagha na Mawandiko gha Kuela mazima. Hung'u wakuletela wenyi kuhaita.

¹⁷ Ela inyo washayo, mwamanya agha; kwa hung'u kulindeni eri simwalongozo kisha kwa makosa gha wandu wawase na mugwe kufuma andu kwenyu kwaloli.

¹⁸ Ela juzileni kuzeguwa kele mbazi na kumanya kwa Bwana wetu na Mkizi Jesu Kristo. Kwake kukala Ubwaa, ndamu na kwa kale na kale. Ameni.