Biblia Todo Logo
Bìoball air-loidhne

- Sanasan -

2 Petro 2 - UVORO GHWALOLI KWA WANDU WOSE


Walimu wa ndimi

1 Koluo na wana tondolo wa ndimi ghati ya wandu selyi kwenyi kujekala na walimu wa ndimi ghati yenyu. Wejefundisa mafundiso gha ndimi ghehaitisa, na kumukana Bwana awakombole, nawo wejekuletela wenyi kuhaita kwa shashowa.

2 Wandu wengi wejeirima ngila zawe ziwase, na kwa madeo ghawe ghawase wandu wazima wejeghora laghelaghe ighulu ya Ngila ya fulo.

3 Kwa tamaa zawe ziwase, walimu awa wa ndimi wejepata faida kwa kumughorera malagho gha ndimi. Kwani kwa ngelo ndele, Mtaghanyi wawe uwo kedafwa na Mhaitisi uwo meso!

4 Mlungu sawafwilile waya wana malaika wadeile kaung'a kungi, ela wanawakumbile kele moto ghwa Jehanamu andu wafungilo kizeni, wekedafurira Ijua lya kutaghanyo.

5 Mlungu sawafwilile waya wandu wa urumengu ghwa kale kungi, ela wanamkizile Noa na wandu mfungate, kwa kukala woluo kechila gha hachi ngelo arukise meji kele isanga lya wandu siwewo wa Mlungu, nagho ghakawahaitisa.

6 Mlungu wanataghanye mizi ya Sodomu na Gomora kwa kuiisha na moto, kaidea ikale fwana ya agha ghewapatagha wandu siwewo wa Mlungu.

7 Naye wanamwokole Loti mundu wa hachi, uyu eluo kewasilo ni mighendo iwase ya wandu wa kisha.

8 Ulya mundu wa hachi oluo kekala nawo, kila ijua kasirima ngoloni kwa kuona na kusikila madeo ghawe ghawase.

9 Kwa hung'u, Bwana wanaweni kuwaokola wandu wa Mlungu kele matimo na kuwaika wandu wa laghelaghe matirironi mpaka Ijua lya kutaghanya;

10 kuchumba walye weirimagha tamaa zawe ziwase za muli na kumenya nguma ya Mlungu. Walimu walye wa ndimi wana ngazo na wanakuonagha, siwawesi ishima kwa viumbo va ighulu va ubwaa va mlunguni na wavitukana.

11 Hata wana malaika, awa weo na ndighi na udimo kuwaisa awa walimu wa ndimi, siwawashitakiagha wo kwa matukano hambiri ya Bwana.

12 Ela awa wandu wadea sa nyamandu za isakeni sizewesi akili, zivelo ziwato na kuulagho; watukana kila kindu siwechitambulagha. Na wose wehaitisogho sa nyamandu za isakeni,

13 na kulipo matiriro kwa undu ghwa makosa waghaletile. Mabwelo ghawe ni kudea kindu cho chose na msenya ghati, chidima kukatisa beha zawe za muli; wakala ni waya na aibu kukala ngaro nenyo kwa chakulya, kunu wekeboelo ni ngila zawe zeembaemba!

14 Siwashaile kulola kindu chingi sala wake wezinga. Tamaa yawe kwa kaung'a siiduwagha. Wandu wanyonge wangizo mteghoni. Ngolo zawe zatawalo ni tamaa ya choyo, wamalila kuwanyizilo ni Mlungu!

15 Waisigha ngila ighoroke na kulaghaya ngila; wairima ngila yeirimo ni Balaamu mwana wa Beori, uyu eshaile pesa eluo upatagha kwa kudea laghelaghe,

16 ela kakanyilo kele kaung'a yake. Punda yake siyeghora ikaghora sa mdamu na kuzumuisa madeo gha mutu gha tondolo.

17 Wandu awa ni sa ndoo ziomile meji na sa maengu ghetukogho ni mbeo, Mlungu wanawaikilile ulalo ghawe andu kwa mweni kwa kiza.

18 Waghora malagho ghekukasa na gha uzimu, na kutumia tamaa zawe za muli ziwase kuwategha walye wedyowagha indakwenyi kutaghana na wandu wakalagha makoseni.

19 Wawaikila wandu vilago va uhuru ngelo wo wenyi watula wasunyi wa mighendo iwase, kwani mundu ni msunyi wa icho kindu cho chose chimlemagha kuchisigha.

20 Wandu wafisika kufuma mighendo ya kaung'a ya urumengu kwa kumumanya Bwana wetu na Mkizi Jesu Kristo, ela wawato sena na kusimo. Wandu sawa kudua wawasa kuchumba selyi weluo kudyoweni.

21 Yekalagha baha kwawe ngera siwemanyile ngila ya hachi, kuchumba kuimanya na kughaluka kufuma mlomu ghwa kuela ghulya wahawilo kudyoweni.

22 Agho ghawapata gheonyezagha kamba makataniso agha ni gha fulo, “Chuchu yanalyigha matahike ghake ghenyi” na “Nguluwe ikaoghesho yanauya ibunguruwe kele mabodo.”

(C) The Bible Society of Kenya, 1993

Bible Society of Kenya
Lean sinn:



Sanasan