2 Petro 1 - UVORO GHWALOLI KWA WANDU WOSE

¹ Imi Simoni Petro, mtumishi na mtumo wa Jesu Kristo, nawandika kwenyu muhawilo idumusi lya zoghori mbwaa sa lyetu, kwa ngila ya hachi ya Mlungu wetu na Mkizi Jesu Kristo:

² Mbazi na sere ijuzilike kwenyu kele kumumanya Mlungu na Jesu Bwana wetu.

Kupang'o na kusaghulo ni Mlungu

³ Kwa ndighi za kimlungu, Mlungu watihawa vindu vose tishaile eri tikale wa kuela. Vindu ivo vose ni vetu kwa ngila ya kumumanya uyu atipang'ile tikale na ngaro naye kwa vake va ubwaa na va uloli.

⁴ Kwa undu ughu watihawa isi vindu vibwaa na manosi gha zoghori mbwaa atilagile, eri kwa manosi agha mupate kukila kufuma tamaa ziwase zio urumenguni na mudime kupata va ngaro va kiulungu.

⁵ Kwa undu ughu deeni chadi kujuzila uloli kele idumusi lyenyu; na kele uloli mujuzile kumanya;

⁶ na kele kumanya mujuzile kukumanzira; kele kukumanzira mujuzile kurumaghia; na kele kurumaghia mujuzile uloli;

⁷ na kele uloli mujuzile mashayo gha uwakwetu; na kele mashayo gha uwakwetu mujuzile mashayo.

⁸ Kwani mkakala na agha malagho kwa ungi ghemudeagha mdee ghaloli na mvale mavalo ghemumanya Bwana wetu Jesu Kristo.

⁹ Ela uyo wose sewesi agha ni kifondo na saona, na waluwala kamba wanaeleso kele kaung'a zake za kale.

¹⁰ Kwa hung'u wana wakwetu, timeni kufunga ndighi kuchumba, na kudea kupang'o kwenyu ni Mlungu na kusaghulo kukala kotula; mukadea hung'u simusighagha idumusi lyenyu.

¹¹ Kwa ngila iyi muhawogho hachi yengila uzuri ghwa kale na kale ghwa Bwana wetu na Mkizi Jesu Kristo.

¹² Kwa hung'u nijemkumbusa ngelo zose malagho agha, hata ngera sani mwaghamanya na mwamanga kele hachi muipatile.

¹³ Ngelo zose nio moyo, niririkanya ni karakara kwangu kunula maririkanyo ghenyu.

¹⁴ Namanya kamba kafwani nisighanagha na ughu muli ghwefwa, selyi Bwana wetu Jesu Kristo anionyeza mwazi.

¹⁵ Nemi nijedea selyi nidimagha, kumpatila ngila yekumbuka malagho agha ngelo zose nyuma ya imi kufwa.

Awa waonile ubwaa ghwa Kristo

¹⁶ Ngelo timufundise kamba Bwana wetu Jesu Kristo ujeja na ndighi mbwaa, sitiirime ngano zitungilo kwa ulachu. Isi kwa meso ghetu tanaonile ubwaa ghwake.

¹⁷ Isi teluo awenyi ngelo ehawilo ishima na ubwaa ni Mlungu Aba; na lwaka lukeja kwake kufuma kwa Mubwaa wa Ubwaa, keghamba, “Uyu ni Mwana wangu Mshayo, niboelogho niye.”

¹⁸ Isi wenyi tanasikile ulu lwaka kufuma mlunguni ngelo tekezanye naye kele mghondi ghwa kuela.

¹⁹ Kwa hung'u uvoro ghughoriro ni wana tondolo ghwajuzilo ndighi. Nenyo mjedea kirani mkaghuwata kwa kukala ni sa taa iwakagha kele andu kwa kiza hata msenya ghuele na mlangazi ghwa ndonde ya ikesho kiro ghulangaze ngolo zenyu.

²⁰ Ela kuchumba ghose, kumbukeni kamba sikuwesi mundungi edimagha kueleza mwenyi utondolo ghuo kele Mawandiko gha Kuela.

²¹ Kwani sikuwesi uvoro ghungi ghwa utondolo lyingi ghukujagha kwa mashayo gha mdamu, ela wandu wanalongozo ni Roho wa Kuela kughora uvoro kufuma kwa Mlungu.