2 Johana 1 - UVORO GHWALOLI KWA WANDU WOSE

¹ Imi mghosi nakuwandikila uwe muke usaghulo na wana wako niwashaile kwa fulo; na simi ungi eke, ela na wose waiweni fulo wanamshaile.

² Kwa undu ughu, fulo iyi ikalagha amweni kwetu na ijekala nesi hata kale na kale.

³ Mbazi, kufwila waya na sere kufuma kwa Mlungu Aba na Jesu Kristo Mwana wa Aba, zikale ngila mojori nesi kele fulo na mashayo.

Fulo na mashayo

⁴ Nanaboelelo na ndighi kuona wamoju wa wana wako wekeiirima fulo, selyi kwenyi tilaghizo ni Aba.

⁵ Na ndamu nakulomba muke wa wandu, si kughamba nendekuwandikila mlomu mwishi, ela mlomu teluo nagho kufuma kudyowa, ghoshayana isi wenyi na isi wenyi.

⁶ Kwani agha nigho mashayo, tiwate milomu ya Mlungu. Ughu nigho mulomu musikile kufuma kudyowa kamba mukale kele mashayo.

⁷ Kwani wandu wengi wa ndimi wajula urumenguni kose. Wandu siwedumusagha Jesu Kristo ukujagha kwa muli, awa niwo waembiembi na wamaiza wa Kristo.

⁸ Kulindeni, eri simojehaitisa ghalye mughadeilile kazi, ela mulyipate inosi lyenyu lyose.

⁹ Mundu uwo wose eghendagha hambiri na seirimagha mafundiso gha Kristo, si wa Mlungu ungi. Ela uyu eirimagha mafundiso, wana Aba na Mwana.

¹⁰ Ngera mundungi eja kwenyu, naye seletagha mafundiso agha, simwamuhokere nyumba kwenyu, hata simwamuroghowe.

¹¹ Kwani uyo wose emuroghowagha, wanadumusilanagha na ulaghelaghe ghwake.

Malagho gha kudua

¹² Nio na mengi ghemwandikila, ela sishaile kutumia karatasi na wino. Ela nio nikekoserea kuja tionane na tihelee meso kwa meso, eri mabwelo ghetu ghakatile.

¹³ Wana wa wakwenyu wa wake msaghulo wakuroghowa.