1 Wathesaloke 5 - UVORO GHWALOLI KWA WANDU WOSE

Kaleni kirani kwa kuja kwa Bwana

¹ Ighulu ya ngelo na vilimo ngelo agha ghekalagha siifweni timwandikile wana wakwetu.

² Kwani inyo wenyi mwanaweni kirani kamba Ijua lya Bwana lyikujagha sa kiting'a na kiro.

³ Ngelo wandu weghambagha, “Kila kindu chananyamale na kwana sere;” niko kuhakilika kuwajilagha iyo ngelo yenyi. Malagho ghawajila shoshowa selyi lwambo lwa muke lovala lukujagha na wandu siwedimagha kukila.

⁴ Ela inyo wana wakwetu, si muo kizeni kungi na ijua ilyo silyimjilagha kumushinisa sa kiting'a.

⁵ Inyo inyose ninyo wandu wa mlangazi na wana wa msenya. Isi sitio wa kiro ango wa kiza.

⁶ Kwa hung'u sitatungure sa wazima, tikale tilavile na sitenaruwe.

⁷ Kwani ni na kiro wandu watunguragha na ni na kiro wandu wanaruwagha.

⁸ Ela isi nisi wandu wa msenya siyefweni tinaruwe. Ni suti tirware idumusi na mashayo sa ngao yelinda lagaya, na ikosereo lya ukizi lyikale sa kofia ya chuma.

⁹ Kwani Mlungu satisaghule tihaite kwa hare yake, ela tipate ukizi kwa ngila ya Bwana Jesu Kristo.

¹⁰ Uyu afwile kwa undu ghwetu eri tipate kukalanya naye, ikalagha tio moyo ango tafwa ngelo ekujagha.

¹¹ Kwa hung'u mkumbane ngolo na kuwarurana selyi mudeagha indakwenyi.

Malaghizo gha kudua na maroghoi

¹² Nesi wana wakwetu, tamulomba muwahawe ishima walye wadeagha kazi kwenyu, walye wamlongozagha na kumfundisa kwa undu ghwa Bwana.

¹³ Wahaweni ishima ibwaa na muwashaye, kwa undu ghwa kazi wazideagha. Mkale na sere inyo wenyi.

¹⁴ Nesi tendemlomba wana wakwetu, muwaonye waghadi, muwakumbe ngolo awa wafwa ngolo, muwawarure awa weo wanyonge na murumaghie wandu wose.

¹⁵ Mundungi wenyu salwanile ulaghelaghe kwa ulaghelaghe, ela ngelo zose mudeelane ghaloli inyo wenyi na wandu wose.

¹⁶ Boeloni ngelo zose.

¹⁷ Mlombe ngelo zose.

¹⁸ Mkale mukefunya asanta kwa kila undu ugho ghose, kwani hung'u niko ashaile Mlungu kwenyu kwa undu ghwa Kristo Jesu.

¹⁹ Simwamuzime Roho wa Kuela.

²⁰ Simwamenye utondolo.

²¹ Pimeni kila ilagho, muwate lyio lyaloli

²² na muleghe ghose ghawase.

²³ Mlungu uyu atipatilagha sere amudee mkale waeli kwa kila ngila na kumulinda roho, ngolo, na mili yenyu, simwakale na ikosa lyingi ngelo ekujagha Bwana wetu Jesu Kristo.

²⁴ Naye uyu ampang'ile ujeghadea, kwani ni mdumusiliki.

²⁵ Mtilombele natose wana wakwetu.

²⁶ Waroghoweni wana wakwetu wose kwa kuwasusuga kwa kiroho.

²⁷ Nendemghemesa kwa undu ghwa Bwana muwashomele wana wakwetu barua iyi.

²⁸ Mbazi ya Bwana wetu Jesu Kristo ikale kwenyu.