1 Wathesaloke 4 - UVORO GHWALOLI KWA WANDU WOSE

Maisha ghemuboela Mlungu

¹ Kuduweni, wana wakwetu, mwanakufundise kufuma kwetu selyi imufweni kukala eri kumuboela Mlungu. Nako hung'u niko kwenyi mukalagha. Na ndamu tendemlomba na kumvoya kwa izina lya Bwana Jesu mudee hung'o kuchumba.

² Kwani mwamanya malaghizo timuhawile kwa izina lya Bwana Jesu.

³ Mlungu wanashaile mkale waeli na mkulinde putu na uzingi.

⁴ Kila mlume ni suti amanye kukala na muke wake kwa ueli na ishima,

⁵ na si kukala na tamaa ziwase sa wandu siwemweni Mlungu.

⁶ Kwa hung'u mundungi samkosele mumbawe ango kumukalila kwa ilagho ilyi. Kwani tanamghorerere na kumuonya kamba Bwana niye ewakwitagha wandu wedeagha agha ghose.

⁷ Mlungu satipang'ile tikale kele uzingi kungi, ela tikale kele ueli.

⁸ Kwa hung'u, uyo wose eleghagha mafundiso agha, semuleghagha mdamu ungi, ela Mlungu uyu atihawagha Roho wake wa Kuela.

⁹ Kele malagho gha kushaya wana wakwetu wadumuse, siifweni nimwandikile. Kwani mwanafundiso ni Mlungu mushayane inyo wenyi.

¹⁰ Na fulo mwanawashaile wana wakwetu wose kele Makedonia. Nesi tamulomba wana wakwetu mujuzile kuchumba.

¹¹ Mkale wandu wekala kima na kudea kazi zenyu zempatila vindu venyu, selyi temuuzile.

¹² Kwa ngila iyi mjehawo ishima ni walye siwedumuse na simujekala mkewaruro ni mundungi kwa vindu.

Kuja kwa Bwana

¹³ Wana wakwetu, tanashaile mumanye fulo ighulu ya walye wafwile, eri simwahariso sa walye siwewesi ikosereo.

¹⁴ Isi tadumusa kamba Jesu wanafwile na kazuka sena, na niko kwenyi tadumusa kamba Mlungu ujewaleta ngila mojori na Jesu walye wose wafwile wekemdumusa.

¹⁵ Kwani agha timughoreragha nigho mafundiso gha Bwana. Isi tidokogho moyo ijua Bwana ekujagha, sitiwakayailagha walye wamalile kufwa.

¹⁶ Kujefunyo mlomu, lwaka lwa malaika mubwaa, na lwaka lwa gunda ya Mlungu, ngelo Bwana mwenyi eselelagha kufuma mlunguni. Nao walye wafwile wekemdumusa Kristo wejezuka jako,

¹⁷ na ima isi tio moyo ilya ngelo, tijekoghanyo nawo maenguni kumumarira Bwana mbeoni. Na aho tijekala ngila mojori na Bwana.

¹⁸ Kwa hung'u, sarusaneni kwa malagho agha.