1 Wathesaloke 3 - UVORO GHWALOLI KWA WANDU WOSE

¹ Nao kudua sitidimile kurumaghia. Kwa hung'u tikaona tikale Athene keng'weri,

² na timutume wakwetu Timotheo mtumishi wa Mlungu kele kuchila Ilagho Lyaloli lya Kristo. Tanamtumile eri amumangise kele idumusi na kumufunda,

³ eri mundungi wenyu saghaluke kwa undu ghwa uku kusirimiso. Nenyo mwamanya masirimi agha ni ghetu.

⁴ Kwani ngelo tekezanye, temghorere kihambiri kamba titirirogho, na selyi mwamanya, niko kwenyi kwakala.

⁵ Kwa hung'u niko nimutumile Timotheo. Nanalemilo ni kurumaghia, kwa hung'u nikamtuma eri amanye gha idumusi lyenyu. Neluo na wogha ghwa Shetani kumtima inyo na kazi yetu kukala nduu.

⁶ Ela ndamu Timotheo wauya kwetu na watiletela uvoro ghwaloli ghwa idumusi na mashayo ghenyu. Watighorera kamba mwanatiririkanyagha kirani na mwanashaile kutiona selyi tishaile timwone.

⁷ Kwa hung'u, kele wasi ghwetu ghose na masirimi, takumbo ngolo ni idumusi lyenyu.

⁸ Kwani ndamu takala moyo ngera mwamanga kele kuwataniso na Bwana.

⁹ Ndamu tamfunyila Mlungu wetu asanta kwa undu ghwenyu. Tamfunyila asanta kwa mabwelo tio nagho naye kwa kukala nenyo.

¹⁰ Tio na kumlomba kiro na msenya eri atidimise kumwona inyo meso kwa meso, eri timujuzile ichi chagotua kele idumusi lyenyu.

¹¹ Ndamu Mlungu na Aba wetu mwenyi, na Bwana wetu Jesu, aboese ngila yetu yeja kwenyu!

¹² Bwana amujuzile kushayana inyo wenyi na wandu wose selyi isi timushaile inyo.

¹³ Kwa ngila iyi ujemumangisa ngolo zenyu, mukale muelile hambiri ya Mlungu wetu na Aba, ngelo Bwana wetu Jesu ekujagha ngila mojori na waeli wake wose.