1 Wathesaloke 2 - UVORO GHWALOLI KWA WANDU WOSE

Kazi ya Paulo alye Thesalonike

¹ Inyo wenyi wana wakwetu, mwamanya kamba kuja kwetu kumuona sikoluo kwa bule.

² Hata ikanakale tanasirimiso na kufwisho waya alye Filipi selyi mumanyagha; Mlungu wetu wotihawile ngolo kumchilila Ilagho Lyaloli lya Mlungu, hata ngera sani koluo na wandu weluo kinyume kibwaa chetu.

³ Ilyi teluo tikemughorera Ilagho Lyaloli, siteluo tikeghora makosa ango laghelaghe, hata siteluo tikemwemba mundungi.

⁴ Ela teluo tikeghora selyi Mlungu eshaile tighore, kwani wanatihawile kueresa Ilagho Lyaloli. Kwa hung'u sitighoragha ghewaboela wadamu, ela Mlungu uyu aweni ngolo zetu.

⁵ Nenyo mwamanya putu kamba sitijile na malagho ghengolangola, malagho gheshaya kupata, Mlungu ni shahidi wetu.

⁶ Hata siteluo tikehada kukumo ni mundungi wenyu ango wazima,

⁷ hata ngera sani sa watumo wa Kristo, teluo na hachi yelomba kindu chingi kwenyu. Ela teluo wa mbole kwenyu selyi muke akalagha na wana wake.

⁸ Na kwa kukala temshaile, tanamusaririre, si Ilagho Lyaloli lya Mlungu tu, ela hata na umana ghwetu. Moluo washayo wetu.

⁹ Kwa hung'u wana wakwetu, kumbukeni selyi tideile kazi kwa kusirima na kurumaghia kiro na msenya, eri sitamusirimise mundungi wenyu ngelo yemuchilila Ilagho Lyaloli lya Mlungu.

¹⁰ Nenyo ninyo mashahidi ghetu, na hata na Mlungu naese, kamba mghendo ghwetu kwenyu inyo mudumuse gholuo ghwa kuela na hachi sikowesi ikosa.

¹¹ Kwani mwamanya temdeilile kila mumoju wenyu selyi aba awadeilagha wana wake. Tanamfundile kila mumoju wenyu na kumkumba ngolo na kumfunganyizila.

¹² Mghende kwa ngila yaloli imuboelagha Mlungu uyu ampang'ile kupata Uzuri ghwake na ubwaa.

¹³ Na sena tamfunyila Mlungu asanta ngelo zose kwa undu ughu. Ngelo temletelele ilagho lya Mlungu mwanalyisikile mukalyiwata, mukalyiwata si sa ilagho lya mdamu, ela sa ilagho lya Mlungu, nalyo niko lyio. Kwani Mlungu wanadeagha kazi kele inyo mudumuse.

¹⁴ Nenyo wana wakwetu mwanapatilo ni malagho ghalye ghapatile makanisa gha Mlungu kele Judea kwa wandu siweo wa Kristo Jesu. Mwanasirimiso ni waisanga lya mzenyu selyi kwenyi wasirimiso ni Wayahudi wambawe,

¹⁵ awa wamulaghe Bwana Jesu na wana tondolo, na kutigusagusa. Nawo wanamwasilagha Mlungu na ni wamaiza wa kila mundu.

¹⁶ Wanatiimile kuchilila wandu wa mbari nzima eri siwakile. Na kwa ngila iyi wakajuzila kaung'a zawe weluo wekedea. Na ndamu hare ya Mlungu yawajila putu!

Paulo kushaya kuwaghendela sena

¹⁷ Wana wakwetu, tighenda tisighana kwa ngelo njache, tanasighane kwa muli, ela sitisighana kwa roho. Tio na beha yemwona sena!

¹⁸ Tanashaile kuja kwenyu. Imi, Paulo neshaile kuja sena na sena, ela Shetani katitangalila.

¹⁹ Nini ikosereo lyetu ango maboelo, ango kindu chetu chekukasa ngelo Bwana Jesu ekujagha? Ado si inyo?

²⁰ Inyo ninyo kukukasa na mabwelo ghetu.