1 Wathesaloke 1 - UVORO GHWALOLI KWA WANDU WOSE

¹ Imi Paulo, na Silvano, na Timotheo, kwa wandu wa Ikanisa lya Thesalonike, weo wa Mlungu Aba na wa Bwana Jesu Kristo: Mbazi na sere ikale kwenyu.

Maisha na idumusi lya Wathesalonike

² Tamfunyila Mlungu asanta ngelo zose kwa undu ghwenyu inyose na kumkumbuka kele malombi ghetu.

³ Kwani tanamukumbukagha hambiri ya Mlungu wetu na Aba selyi idumusi lyenyu lyideagha kazi, na selyi mashayo ghenyu ghedeagha kazi, na selyi ikosereo lyenyu lyimangile kele Bwana wetu Jesu Kristo.

⁴ Kwani tamanya wana wakwetu, Mlungu wanamshaile na niko kamusaghula kukala wake.

⁵ Kwani tikemletela Ilagho Lyaloli sitimletelele kwa malagho tu, ela kwa ndighi na kwa Roho wa Kuela na kwa kumumanyisa ufulo. Nenyo mwamanya selyi teluo tikedea ghose kwa undu ghwenyu.

⁶ Nenyo mwanairimire mfwano ghwetu na ghwa Bwana. Kwa kuhokera Ilagho Lyaloli kwa kuboelo kufumagha kwa Roho wa Kuela, hata ngera sani mwanasirimiso na mengi.

⁷ Kwa undu ughu mkakala ifwani lyaloli kwa wose wadumuse Makedonia na Akaya.

⁸ Kwani si kughamba ilagho lya Bwana lyanaghendile kufuma kwenyu kufika Makedonia na Akaya keng'weri, ela idumusi lyenyu kwa Mlungu lyaera andu kose, hata sitiwesi ilagho tidimagha kughora.

⁹ Kwani wandu awo waghora gha selyi mutihokere tija kwenyu, na selyi mumughalukile Mlungu na kusigha sanamu, mkamtumikila Mlungu wa fulo ewo moyo,

¹⁰ na kudafurira kuja kwa Mwana wake kufuma mlunguni, Mwana wake Jesu uyu amuzusile kufuma kwa wafwa na atikizagha na hare ya Mlungu ikujagha.