1 Wakorintho 9 - UVORO GHWALOLI KWA WANDU WOSE

Hachi na kazi ya mtumo

¹ Ado imi simi mundu niwo huru? Ado imi simi mtumo? Ado imi simwonile Jesu Bwana wetu? Ado inyo sinyo kazi yangu kwa Bwana?

² Hata ngera kwa wandu wazima simi mtumo ungi, ela kwenyu inyo nimi mtumo! Kwani kukala kwenyu na ungaro na Bwana kwaonyeza mwazi kamba imi nimi mtumo.

³ Ngelo wandu wenifunyagha makosa, nakutetela imi mwenyi kwa ngila iyi:

⁴ Ado sitiwesi hachi yehawo chakulya na kindu chenwa kwa kazi yetu?

⁵ Ado sitiwesi hachi yeirimana na mke Mkristo sa watumo wazima na wana wakwawe Bwana na Petro kele kutamba varo?

⁶ Ango ni Baranaba na imi tu, ifweni tikupatile ivi tishaile kwa kudea kazi?

⁷ Ni askari muni akulipilagha mwenyi gharama zake za uteni? Ni mlimi muni selyighagha mavalo gha mbuwa yake ya mizabibu? Ni mlisa muni alisagha mali sepatagha mazia gha mali yake?

⁸ Ado nendeghora hung'u kidamu? Ado sheria ya Musa siighoragha ukwenyi?

⁹ Kwani yanawandiko kele sheria ya Musa, “swafunge njau mlomu ngelo uitumiagha kukwita viro” Ndamu mughelelagha kamba Mlungu ondeghora ighulu ya njau?

¹⁰ Ado seluo keghora ighulu yetu? Fulo ghanawandiko kwa undu ghwetu. Kwani mundu ulya elimagha na ulya ekwashagha yanafweni wadee kazi wekekoserea kupata ifungu lya viro.

¹¹ Ikakala isi tanawandile mbeu za roho ghati yenyu. Ndamu ni laghelaghe kwetu kupata vindu va urumengu kwenyu?

¹² Ikakala wazima wana hachi yepata ivi kufuma kwenyu, Ado isi natose sitio na hachi kuchumba wo? Ela isi sitiitumie hachi iyi. Kibalo chake tarumaghia kila kindu eri sitaike kikwalo kele ngila ya Ilagho Lyaloli lya Kristo.

¹³ Ado simuweni kamba wandu wadeagha kazi kele Hekalu wanapatagha chakulya chawe kele Hekalu? Na walye wafunyagha kizangauna kele mazabahu wanapatagha ifungu kele kizangauna chilya chifunyogho?

¹⁴ Niko kwenyi Bwana eghoragha kwa walye wechilagha Injili wapate vindu vawe kele Injili.

¹⁵ Ela imi situmie hachi izi, hata si kughamba nendewandika hung'u kushaya kupata hachi izi imi mwenyi. Kwani ni baha kwangu nifwe kuchumba kudea mundungi adee kukukasa kwangu kukala kwa tuu.

¹⁶ Kwani ilyi nachila Injili, siwesi hachi yekukasa. Kwani nio na kushurutiso nidee hung'u. Kwani ni bugha kwangu ilyi nalemo ni kuchila Injili!

¹⁷ Ngera nadea kazi iyi kwa kushaya kwangu, nepatagha inosi, ela andu si kwa kushaya kwangu, nendesaghulo ni Mlungu uyu anihawile iyi kazi niidee.

¹⁸ Ndamu nipatagha mshahara muni? Nipate tu ulalo ghochila Ilagho Lyaloli bule, setumiagha hachi ya kazi yangu ya Injili.

¹⁹ Hata ngera sani simi msunyi wa mundungi, nakudea kukala msunyi wa kila mundu eri niwarute wandu wengi.

²⁰ Kwa Wayahudi nanakalile sa Myahudi eri niwarute: hata ngera sani imi mwenyi siwo isi ya Sheria ya Musa, nakudea nio isi ya Sheria ngila mojori nawo eri niwarute.

²¹ Nako kwa walye wandu wa mbari nzima weo shighati ya Sheria ya Wayahudi, nakala sa mundu ewo shighati ya Sheria, eri niwarute wandu wa mbari nzima kwa Kristo. Ela si kughamba kamba siiwatagha Sheria ya Mlungu kungi, kwa fulo nanairimagha Sheria ya Kristo.

²² Ngelo nio ghati ya wanyonge wa idumusi nakala mnyonge sa mumoju wawe, eri niwarute. Kwa hung'u nakala kila kindu kwa wandu wose, eri niwakize wamoju kwa ngila iyo yose.

²³ Agha ghose naghadea kwa undu ghwa Injili, eri nipate ifungu lya mibaraka yake.

²⁴ Namanya kamba mwanaweni walye waisanagha kele kukimbila, siwapatagha manosi wose sala mumojori. Kwa hung'u kimbileni eri mupate inosi.

²⁵ Kila mukimbili wanakumanziragha ngelo yekufundisa na kukuika kirani, eri apate kofia siyetulagha. Ela isi tadea hung'u eri tipate kofia ya kale na kale.

²⁶ Kwa hung'u nakimbila hata andu komalilila; kwa hung'u silwanagha sa mkumbi ngonde eribagha mbeo.

²⁷ Ela Naghukulisa muli ghwangu na ngonde na kughumanzira kamare, eri siyejekala nyuma ya kuchilila wazima imi nijelegho.