1 Wakorintho 7 - UVORO GHWALOLI KWA WANDU WOSE

Makotelo ighulu ya kulola

¹ Ndamu kwa malagho ghalye muwandike ighulu yake. Ni kirani mundu salole.

² Ela kwa undu ghwa uzingi kukala mungi, kila mundu akale na mkwake mwenyi, na kila muke akale na mlume wake mwenyi.

³ Mlume amhawe mkwake gheo hachi yake, na muke naese amhawe mlume wake gheo hachi yake.

⁴ Muke sawesi ndighi ighulu ya muli ghwake sala mlume wake na mlume naese sawesi ndighi ighulu ya muli ghwake sala mkwake.

⁵ Simwaimane sala mkale mwapatana kudea hung'u kwa ngelo, eri mutumie iyo ngelo kwa malombi; ela muwuilane sena, kwa ngila iyi shetani semutimagha kwa kulemo ni kukumanzira.

⁶ Naghora agha kwa kumfunda, na si kwa kumushurutisha.

⁷ Neshaile inyose mkale sa imi. Ela kila mumoju uwo na inosi lyake kufuma kwa Mlungu, mumoju inosi ilyi na mzima inosi lyilya.

⁸ Ndamu kwa walye siwelole na walye wafwililo nendeghora kamba ni kirani kwawe kukala wo wenyi selyi imi nio.

⁹ Ela ngera siwedimagha kukumanzira, ni bora walole. Kwani ni bora kulola kuchumba kuwako ni tamaa.

¹⁰ Kwa walye walole nio na mlomu sighweo ghwangu, ela ni ghwa Bwana. Muke ni suti samsighe mlume wake;

¹¹ ela ilyi amusigha sauso ango apatane na mlume wake, na mlume ni suti samleghe mkwake.

¹² Kwa wazima nendeghora Imi mwenyi na si Bwana. Ikakala wakwetu Mkristo wana muke sedumuse, naye wadumusa kukalanya naye ni kirani samuleghe.

¹³ Na ngera muke ungi Mkristo ausilo ni mundu sedumuse na ulya mundu wadumuse kukala naye, ni kirani samusighe.

¹⁴ Kwani mlume sedumuse wadumusilo ni Mlungu kwa kuwataniso na mkwake, naye muke sedumuse wadumuso ni Mlungu kwa kuwataniso na mlume wake. Ngera si hung'u, wana wawe macha wendekala sa wandu siwemweni Mlungu, ela selyi iwo, wadumusilo ni Mlungu.

¹⁵ Ela ilyi ulya sedumuse ashaya kumusigha mumbawe Mkristo, amusighe; kwa ngila iyi wakwetu mlume ango muke, sefungogho. Kwani Mlungu wanampang'ile mkale kele sere.

¹⁶ Ndamu uwe muke Mkristo wamanya ije kamba sumukizagha mlume wako? Ango uwe mlume Mkristo wamanya ije kamba sumukizagha mkwako?

Mkale selyi Mlungu ampang'ile

¹⁷ Kila mumoju akale kuirimana na inosi lya Bwana ahawilo na selyi eluo ngelo epang'ilo ni Mlungu. Agha nigho nifundisagha makanisa ghose.

¹⁸ Ngera kuwo na mundungi apang'ilo ni Mlungu achwilo, Sakudee sachwilo. Ngera kuwo na mundu apang'ilo ni Mlungu sechilo, sachwigho.

¹⁹ Kwani kuchwigho ango kulemo ni kuchwigho si kindu chingi, ela chishaike ni kuwata milomu ya Mlungu.

²⁰ Kila mumoju akale selyi eluo ngelo yepang'o ni Mlungu.

²¹ Woluo msunyi ngelo opang'ogho ni Mlungu? Swatale agho; ela, kwaghupata ukidina, ghutumie.

²² Kwani msunyi uyu apang'ilo ni Bwana ni mkidina wa Bwana; na mkidina apang'ilo ni Kristo ni msunyi wake.

²³ Mwanaghulilo kwa zoghori; kwa hung'u simwawuye wasunyi wa wandu.

²⁴ Kwa hung'u wana wakwetu, kila mumoju akale kele ungaro ghwa Mlungu selyi kwenyi eluo kepang'o.

Makotelo ighulu ya wake siweusilo na wafwililo

²⁵ Ndamu ighulu ya malagho gha wandu kulegha kulola ango kuuso selyi muniwandikile: siwesi mulomu ghungi ghwa Bwana, ela nendefunya maririkanyo ghangu sa mundu mdumusiliki afwililo waya ni Mlungu.

²⁶ Kwa kuirimana na wasi ghwa indakwenyi, nighelelagha ni kirani mundu kukala selyi ewo.

²⁷ Uwo na muke umusile? Swahade kusighana naye. Wanatula solole? Swahade kulola.

²⁸ Ela ilyi walola, sudeile kaung'a ingi; na mchana seusilo ilyi auso, sadeile kaung'a ingi. Ela awa welolagha wejepato ni masirimi gha urumengu, na ndeshaya nimukize na masirimi agho.

²⁹ Ilagho nighoragha wana wakwetu ni ilyi, ngelo yasigho ni njache, na kufuma indakwenyi, wandu walole wakale sa wandu siwelole,

³⁰ walye weshighiragha wakale sa wandu siwefuruse; walye wesekagha wakale sa wandu siweboelelo, walye weghulagha wakale sa walye siwewesi vindu waghulile.

³¹ Walye wadeagha zoghori na vindu va urumengu, wakale sa wandu siwedeagha zoghori putu navo. Kwani urumengu ughu selyi ghuo indakwenyi ni ghohaita.

³² Nanashaile mkale simwewo na wasi ghungi. Mundu selole wanakusirimisagha mwenyi na kazi ya Bwana, kwa kukala wanahadagha kumuboela Bwana.

³³ Ela mundu alole wanakusirimisagha na gha urumengu, kwa kukala wanashaile kumuboela mkwake,

³⁴ kwa hung'u wasarika gasi mbili. Muke seusilo ango seweni mlume wanakusirimisagha mwenyi na kazi ya Bwana. Kwa kukala wanashaile kukala wa kuela muli na roho, ela muke ausilo wakusirimisa na gha urumengu eri amuboele mlume wake.

³⁵ Nendeghora hung'u kwa kukala nanashaile kumwarura, si kughamba nendeshaya kumufunga. Ela nendeshaya mdee ghaloli na ghafweni, na mkufunye putu kwa utumishi ghwa Bwana kwa ngolo yose.

³⁶ Ela ngera mundu ewo na ulanga eonagha kamba seghenda kirani na ulya amkumbagha ulanga, na ngera tamaa yake ni mbwaa, na niko ikalagha, haya sadee selyi ashaile, alole na iyo si kaung'a ingi.

³⁷ Ela ilyi mundu amanya sashaile kulola, sikweo na kufunganyizilo, na ngera wakumanzira putu na uwo na ngolo yelinda muchana emusagha sikweo kumsughutila, wadea kirani kalegha kumusa.

³⁸ Kwa hung'u uyu mundu elolagha wadea kirani, na uyu selolagha udeagha kirani kuchumba.

³⁹ Muke ausilo wanafungilo ngelo yose mlume wake ewo moyo, ela mlume wake kafwa, wadima kuuso ni mlume uwo wose, ela akale Mkristo.

⁴⁰ Ela nionagha mabwelo kuchumba ilyi akala ukwenyi. Na namanya nio na Roho wa Mlungu.