1 Wakorintho 6 - UVORO GHWALOLI KWA WANDU WOSE

Wakristo kushitakiana

¹ Ngera mundungi akala na ilagho na Mkristo mumbawe, ughendagha ije kwa wataghanyi siwewo wa Mlungu wa fulo kibalo cheghenda kwa wandu wa Mlungu kutaghanyo?

² Ado simuweni kamba wandu wa Mlungu wejetaghanya urumengu? Ndamu ikakala mdimagha kutaghanya urumengu, mulemogho ije kutaghanya malagho machache?

³ Ado simumanyagha kamba tijetaghanya wana malaika? Ndamu si kuchumba kwa isi kudima kutaghanya malagho gha ughu umana!

⁴ Ndamu ilyi malagho sa agha gheja, mughaghenzagha ije ghataghanyo ni wandu siweo wa ikanisa?

⁵ Naghora hung'u kwa kumufwisha waya. Namanya kamba kuwo na mundu mumojori wenyu ewo na suku kele ungaro ghwenyu, edimagha kutaghanya malagho gha wana wakwetu weo na mateto.

⁶ Ela Mkristo wamughenza Mkristo mumbawe kele kutaghanyo na ataghanyo ni mundu hata sedumusagha.

⁷ Kwa fulo kushitakiana ghati yenyu kwaonyeza kamba si muo karakara. Siyeluo ni bora kwenyu kukoso? Siyeluo ni bora kwenyu muiwilo?

⁸ Ela inyo mwadeilana makosa na kusoka, mwasoka hata wana wakwenyu wenyi.

⁹ Namanya mwamanya kamba walaghelaghe siwepatagha uzuri ghwa Mlungu. Simwakuembeembe inyo wenyi, wandu weo wazingi ango watasi sanamu ango wasusi,

¹⁰ ango viting'a ango weo na choyo ango wanaruwi ango waguni, ango wavekuri, wandu sa awa siwepatagha Uzuri ghwa Mlungu.

¹¹ Wamoju wenyu weluo hung'u. Ela mwanaeleso kaung'a, mkafunyo kwa Mlungu na kupataniso na Mlungu ni Bwana Jesu Kristo na Roho wa Mlungu wetu.

Kutumia mili kwa ubwaa ghwa Mlungu

¹² Mundu mumoju ughoragha, “Vindu vose sivio na mrighido kwangu”. Ee, ela si vindu vose vio valoli. Vindu vose sivio na mrighido kwangu, ela sisighagha kindu chingi chinidee msunyi.

¹³ Mundu wadima kughora, “Chakulya ni kwa kifu na kifu ni kwa chakulya.” Ee, ela Mlungu ujevihaitisa vose. Muli sighotumio kwa kuzinga, ela ni kwa kumtumikila Bwana; naye Bwana ni kwa muli.

¹⁴ Mlungu wanamuzusile Bwana kufuma kifweni, naye ujetizusa natose kwa udimo ghwake.

¹⁵ Ado simuweni kamba mili yenyu ni viungo va Kristo? Ndamu niuse luhande lumoju lwa Kristo niludee kukala kiungo cha kijimbo? Hata!

¹⁶ Ado simuweni kamba uyu ewatanagha na kijimbo, wakala muli ghumojori naye? Kwani Mawandiko gha Kuela ghaghora, “Awo waili wekalagha muli ghumojori.”

¹⁷ Ela uyu awataniso na Bwana wakala roho mojori naye.

¹⁸ Kimbileni uzingi. Kaung'a zose mdamu edeagha, zio shighati ya muli ghwake, ela mundu ezingagha, wadea kaung'a ighulu ya muli ghwake.

¹⁹ Ado simuweni kamba mili yenyu ni hekalu ya Roho wa Kuela, uyu akalagha amweni kwenyu na mhawilo ni Mlungu? Inyo sinyo wenyu wengi kungi, ela wa Mlungu.

²⁰ Mwanaghulilo kwa zoghori. Kwa hung'u tumieni mili yenyu kwa ubwaa ghwa Mlungu.