1 Wakorintho 4 - UVORO GHWALOLI KWA WANDU WOSE

Watumo wa Kristo

¹ Mutitaleghe isi kukala watumishi wa Kristo, awa waikilo kulinda viviso va fulo ya Mlungu.

² Ilagho lyishaike kwa mtumishi ni kamba akale mdumusiliki kwa Bwana wake.

³ Ela kwangu imi sionagha ni kindu chingi kutaghanyo ninyo ango mdamu ungi. Hata sikutaghanyagha imi mwenyi.

⁴ Ngolo yangu yanaelile, ela si kughora kamba siwesi ikosa. Bwana niye ewo mtaghanyi wangu.

⁵ Kwa hung'u simwataghanye mundungi hambiri ya ngelo kufika. Utaghanyo ghwa kudua ni suti ghudafwe kuja kwa Bwana, uyu eletagha mlangazini ghalye ghavisike kizeni na kufunukula ghalye gheo ngoloni kwa wandu. Nao aho kila mundu upatagha kuliko ni Mlungu.

⁶ Wana wakwetu, ni kwa undu ghwenyu naghora agha ighulu ya Apolo nemi, niketumia mfwano ghwetu kumdea mutambule agha maghoro, “Lindeni sheria za fulo.” Mundungi sakukase na mumoju na amumenye mzima.

⁷ Nani akuikile uwe kukala mubwaa? Ado Mlungu siye ungi akuhawile kila kindu uwo nacho? Ndamu nini ukukasilagha sa kuzo icho uwo nacho si inosi lyingi?

⁸ Mughelelagha mwana kila kindu! Mughelelagha ninyo wazuri! Mughelelagha mwakala wazuri wetawala isi siteo! Macho ninyo wazuri wetawala ngila mojori nesi.

⁹ Niririkanyagha kamba Mlungu watihawa isi watumo ulalo ghwa naisi kwa wose, sa wandu wataghanyo kufwa wanduni, kwani tazighano ni urumengu ghose ghwa wana malaika na wadamu.

¹⁰ Kwa undu ghwa Kristo isi nisi wazimu, ela inyo ninyo walachu kwa kuwataniso na Kristo! Isi te wanyonge, ela inyo muo na ndighi! Isi tamenyeso, ela inyo mwahawo ishima!

¹¹ Iyi ngelo yenyi tio njala na kau, tarwara mirafu, taribo, na sitiwesi mizi,

¹² tasirima kwa kudea kazi zikulile. Ngelo tiwanyizogho, tabariki: ngelo titirirogho, tarumaghia;

¹³ Ngelo titukanogho tatumbulila malagho ghaloli. Takala sa majala gha isanga hata hung'u indakwenyi; nisi majala gha wandu!

¹⁴ Siwandikagha malagho agha kwa undu ghomufwisha waya, ela eri nimufundise sa wana wangu washayo.

¹⁵ Kwani hata ngera sani muo na walezi siwedimagha kutalika kele Ukristo ghwenyu, muo na tatio mumojori. Kwani kwa kuwataniso kwenyu na Kristo, nakala tatio kwa kumuletela inyo Ilagho Lyaloli.

¹⁶ Kwa hung'u namlomba muirime mfwano ghwangu.

¹⁷ Kwa hung'u icho nicho chausa chemtuma Timotheo kwenyu, uyu ewo mshayo wangu na mwana wangu mdumusiliki kele Bwana. Iye ujemkumbusa selyi nikalagha kwa umana mwishi kwa kuwataniso na Kristo Jesu na selyi nifundisagha kele makanisa ghose kila andu.

¹⁸ Wamoju wenyu wakukasa kwa kukala waririkanya kamba sikujagha kwenyu.

¹⁹ Ela nikujagha kafwani Bwana kashaya, nemi nijeona imi mwenyi udimo wewo nagho awa wandu wakukasagha, na selyi waghoragha.

²⁰ Kwani uzuri ghwa Mlungu si ghuo kele kughora, ela kele udimo.

²¹ Mwanashaile kimuni? Mwanashaile nije kwenyu na kiboko ango na roho ya mashayo na umbole?