1 Wakorintho 3 - UVORO GHWALOLI KWA WANDU WOSE

Watumishi wa Mlungu

¹ Wana wakwetu, Imi sidimile kuhelea nenyo sa wandu wewo na roho, ela nanahelee nenyo sa wandu wa urumengu, na sa wanake wakoo kele idumusi lya Kristo.

² Nanamulyisile mazia, simuhawile chakulya chikulile, kwa kukala simwoketi kuchilya. Na hata indakwenyi simuketi kuchilya,

³ kwa kukala mwanatulagha mkekala sa wandu wa urumengu. Ngera kuo na iziso na marashano ghati yenyu, iyi siyendeonyeza kamba ninyo wandu wa urumengu wakalagha kiurumengu?

⁴ Ngelo mundu mumoju eghoragha, “Imi nimi wa Paulo”, na mzima, “Imi nimi wa Apolo”, simondeonyeza sa wandu wa urumengu?

⁵ Apolo nani? Na Paulo nani? Isi nisi watumishi wa Mlungu tu, timlongoze mudumuse. Kila mumoju wetu wanadeagha kazi Mlungu atihawile kudea.

⁶ Imi nanawandile mbeu, Apolo kazitiila meji, ela ni Mlungu azideile zikazeguwa.

⁷ Kwa hung'u, uyu ewandagha na ulya esikililagha meji si kindu chingi. Mlungu uyu ezeguisagha niye woliko.

⁸ Ulya mundu ewandagha na ulya mundu engizagha meji wanakatane. Mlungu ujemhawa kila mumoju inosi kuirimana na kazi yake.

⁹ Kwani isi nisi wadei kazi ngila mojori na Mlungu, na inyo ninyo mbuwa ya Mlungu. Inyo ninyo iwaghali lya Mlungu.

¹⁰ Imi nanatumie mbazi nihawilo ni Mlungu kudea kazi ya mundu wa wuya. Nikawaghala msingi, mundu mzima wanajilewaghala ighulu yake. Ela kila mumoju ni suti azighane selyi ewaghalagha.

¹¹ Kwani sikuwesi msingi ghungi mzima mundu edimagha kuwaghala kuchumba ghulya ghuwaghalo, nagho ni Jesu Kristo.

¹² Wamoju, wejewaghala ighulu ya msingi kwa zahabu ango feza ango mawe gha zoghori mbwaa; wazima wejewaghala na miti ango nyasi ango matasa.

¹³ Ubora ghwa kazi ya kila mundu ghujeonekana ngelo ijefunukulo Ijua lya Kristo. Kwani Ijua ilyo moto ghujeifunukula kazi ya kila mundu, moto ghujetima kuonyeza ubora ghwake.

¹⁴ Ikakala kazi awaghale mundu kele msingi, siyeiyagha na moto, ujepata inosi.

¹⁵ Ela ilyi kazi ya mundungi yaiya na moto ujesowa inosi, ela iye mwenyi ukilagha sa mundu ekilagha kele moto.

¹⁶ Ado simuweni kamba ninyo hekalu ya Mlungu na kamba Roho wa Mlungu wanakalagha amweni kwenyu?

¹⁷ Kwa hung'u ilyi mundungi ahakila hekalu ya Mlungu, Mlungu naese ujemuhakila. Kwani hekalu ya Mlungu ni ya Kuela, na inyo wenyi ninyo hekalu yake.

¹⁸ Mundungi sakuembeembe mwenyi. Ilyi ungi wenyu akughelela kukala na suku ghati yenyu kwa gha urumengu bora akale mzimu, eri akale na suku ya fulo.

¹⁹ Kwani agha gheghelelogho ni urumengu kukala suku ni uzimu hambiri ya Mlungu. Selyi Mawandiko gha Kuela gheghoragha, “Mlungu wanawawatisagha walachu kele ulachu ghwawe.”

²⁰ Na Mawandiko mazima ghaghora, “Bwana wanaweni kamba maghelelo gha walachu sighafweni.”

²¹ Kwa hung'u mundungi sakukase na wandu. Kwani vindu vose ni venyu.

²² Paulo, Apolo na Kefa, ughu urumengu, ubanana na kifwa, gha indakwenyi na ghekujagha, agha ghose ni ghenyu,

²³ nenyo ninyo wa Kristo, na Kristo ni wa Mlungu.