1 Wakorintho 2 - UVORO GHWALOLI KWA WANDU WOSE

Uvoro ghwa Kristo awambilo

¹ Wana wakwetu, ngelo nejile kwenyu kuchila fulo ya Mlungu ivisike situmie malagho ghakulile na gha kumanya kubwaa.

² Kwani ngelo tekezanye, seshaile kumanya kindu chingi kwenyu sala Jesu Kristo na kifwa chake kele msalaba.

³ Kwa hung'u nighenda nija kwenyu, neluo mnyonge na nikegaganika kwa wogha,

⁴ na mafundiso ghangu na machilo sigheluo gha malagho ghasingile gha suku za kidamu, ela gheluo ghengila kwa ndighi za Roho wa Mlungu.

⁵ Eri idumusi lyenyu silyakale kele suku za kidamu, sala kele ndighi ya Mlungu.

Suku ya Mlungu

⁶ Ela hata hung'u, tanaghoragha kwa suku kwa walye wazeguwe kiroho. Ela si kwa suku za urumengu ughu ango za ndighi zideagha nguma urumenguni izi ziduwagha.

⁷ Suku nighoragha ni suku ivisike ya Mlungu, yevisike kwa wadamu, ela yeikilo kwa undu ghwa ubwaa ghwetu kufuma kuumbo urumengu.

⁸ Sikowesi ungi wa watawala wa ughu urumengu eweni suku iyi. Ngera wemanyile, kumacha siwemwambile Bwana wa ubwaa.

⁹ Selyi Mawandiko gha Kuela gheghoragha, “agha mundungi seonile ango sesikile; agha mundungi seghelele ghekalagha, nigho ghenyi Mlungu aikilile walye wamushaile.”

¹⁰ Ela yeluo ni kwa undu ghwetu amanyise viviso vake kwa ngila ya Roho. Kwani Roho yanahadagha kila kindu, hata vivisike va Mlungu.

¹¹ Nani edimagha kumanya maririkanyo gha mundu sala roho iwo amweni kwa uyo mundu! Niko kwenyi iwo, Roho ya Mlungu niyo imanyagha ghose gha Mlungu.

¹² Isi sitipatile roho ya urumengu, ela tanapatile Roho atumilo ni Mlungu eri timanye ghose Mlungu atihawile.

¹³ Kwa hung'u, sitighoragha malagho tifundiso kwa suku za kidamu, ela kwa malagho tifundiso ni Roho, ngelo tighoragha hachi za kiroho kwa walye weo na Roho.

¹⁴ Mundu uwo wose sewo na Roho sedimagha kupata manosi kufuma kwa Roho wa Mlungu. Mundu sa uyo sighemutambukilagha, ghendekala ni sa uzimu kwake, kwa kukala ghatambuka kwa kufunukulo ni Roho.

¹⁵ Mundu uwo wose ewo na Roho wadima kutambula kila kindu chaloli, ela iye sataghanyogho ni mundungi.

¹⁶ Selyi Mawandiko gha Kuela ghaghora, “Nani aweni akili ya Bwana? Nani edimagha kumfunda? Ela isi tio na akili za Kristo.”