1 Wakorintho 15 - UVORO GHWALOLI KWA WANDU WOSE

Kuzuka kwa Kristo

¹ Ndamu wana wakwetu, Nanashaile nimukumbuse ighulu ya Ilagho Lyaloli ilyi nimuchililile, mkalyihokera na kumanga ighulu yake.

² Kwa ngila ya Injili mwaokolo, ikakala muwatile gii agha nimuchililile, simanya ikale mwanadumuse tuu.

³ Kwani imi nanamuhawile kihambiri ghalye imi nipatile: kamba Kristo wanafwile kwa undu ghwa kaung'a zetu selyi gheghoragha Mawandiko gha Kuela;

⁴ kamba wanazikilo na kamba wanazukiso ijua lya katatu selyi kuwandiko kele Mawandiko gha Kuela;

⁵ kamba wanamfumilile Petro, ima kejewafumila watumo wose ikumi na waili.

⁶ Nao uko nyuma kawafumila wana wakwetu maghana masanu ngila mojori, nawo wengi wawe weo moyo hata lelo, hata ngera sani wamoju wanafwile.

⁷ Nao nyuma yake kamufumila Jakobo na nyuma ya aho kawafumila watumo wose.

⁸ Kudua kwa wose kanifumila imi namose sa mundu sevelo kwa ngelo yake.

⁹ Kwani imi nimi mchache wa watumo wose, sefweni hata kuito mtumo, kwa kukala nanalyitirire ikanisa lya Mlungu.

¹⁰ Ela kwa mbazi ya Mlungu nio selyi nio, na ilya mbazi anihawile siyeluo ya tuu, ela nanadeile kazi kuwachumba watumo wose, ela simi ungi, sala ni mbazi ya Mlungu yeluo ikedea kazi amweni kwangu.

¹¹ Kwa hung'u ngera nimi ango niwo, ilyi nilyo timuchililile na ilyi nilyo mudumuse.

Kuzuka Kwetu

¹² Ndamu ikakala Kristo wachilo kamba wanazusilo kufuma kwa wafwa, kudani wamoju wenyu waghora kamba sikuwesi kuzuka kwa awa wafwile?

¹³ Ikakala sikuwesi kuzuka kwa wafwa, ni kuonyeza kukala Kristo sazusilo;

¹⁴ na ikakala Kristo sazusilo kufuma kwa wafwa isi sitiwesi chechila, nenyo simwesi kindu chingi chedumusa.

¹⁵ Isi tionekagha kukala wandimi ighulu ya Mlungu kwa kushuhudia kamba Mlungu wanamuzusile Kristo kufuma kifweni naye samuzusile ilyi yakala wafwile siwezukagha.

¹⁶ Kwani ikakala wafwile siwezusogho, aho Kristo naese sazukiso.

¹⁷ Na ngera Kristo sezusilo, aho idumusi lyenyu ni ituu, na mwanatulagha mlaghaye kele kaung'a zenyu.

¹⁸ Na ni ukwenyi ikalagha kwa walye wose wafwile wekemudumusa Kristo wanahaite.

¹⁹ Ikakala ikosereo lyetu kwa Kristo ni kele umana ughu ghwenyi, aho nisi wandu wefwilo waya kuchumba wandu wose urumenguni.

²⁰ Ela fulo ni kamba Kristo wanazusilo kwa wafwa, kuonyeza kamba walye wafwa wejezuso.

²¹ Kwani selyi kwenyi kifwa chijile kwa undu ghwa mdamu, niko kwenyi na kuzuka kwa wafwa kweja kwa ngila ya mdamu.

²² Kwani selyi kwenyi wandu wose wafwa kwa Adamu, niko kwenyi wose wezusogho kwa Kristo.

²³ Ela kila mumoju ujezuso kwa ngila yake. Hambiri ya wose ni Kristo, nao ngelo yake yeuya, walye weo wake.

²⁴ Nao kujeja kulya kudua, ngelo Kristo efunyagha uzuri kwa Mlungu Aba, ilyi amalila kusima roho za kila utawala, udimo na ndighi.

²⁵ Kwani Kristo ni suti atawale mpaka Mlungu awasime wamaiza wose na kuwaika isi ya maghulu ghake.

²⁶ Mumaiza wa kudua kusimo ni kifwa.

²⁷ Kwani Mawandiko gha Kuela ghaghora, “Mlungu wanaikile vindu vose maghuluni kwake na isi.” Ela kwa kughora “vindu vose vio isi ya maghulu ghake” sikumungizagha Mlungu uyu aikagha vindu vose kukala isi ya Kristo.

²⁸ Ela ngelo vindu vose vaiko isi ya utawala ghwa Kristo, niko iye mwenyi Mwana, ekuikagha isi ya Mlungu, uyu eikile vindu vose isi yake, nao Mlungu atawale vindu vose.

²⁹ Ndamu chiwadeagha wandu wabatizo kwa undu ghwa wafwa nini? Ikakala wafwa siwezusogho? Kudani wandu wabatizo kwa undu ghwawe?

³⁰ Na isi, Kudani tio mashakeni kila saa?

³¹ Nafwa kila ijua wana wakwetu! Kukukasa nio nako kwa undu ghwenyu, kwa umana ghowataniso ni Kristo Jesu Bwana wetu kwanidea nighore hung'u.

³² Kwa kughora kidamu, ikakala nanalwanile na nyamandu zibile Efeso, inifwanagha kimuni ikakala wafwa siwezukagha? “Tilye na tinwe kwani ikesho tifwighagha!”

³³ Simwaemboembo, “Kuirimana na mundu awase kwanahakilagha mghendo ghwa mundu”.

³⁴ Uyeni kele ghaloli na msighe kudea kaung'a, kwani wamoju wenyu siwamweni Mlungu. Nendeghora hung'u eri nimufwishe waya.

Muli ghozuka

³⁵ Ela mundu mumoju ujekotela, “Ado wandu wafwile wezukisogho ije? Wejekala na muli ghufweni ije?”

³⁶ Mpumbavu uwe! Ngelo uwanda mbeu msangeni, siyifumagha jako siyefwile.

³⁷ Nacho ichi uwandagha ni mbeu tu, ngera ya ngano ango ya viro vizima, suwandagha muli ghwa ilya mbeu ghujezegua.

³⁸ Mlungu waihawa ilya mbeu muli ghulya ashaile, iye waihawa kila mbeu muli ghwake.

³⁹ Kwani nyama ya vindu vio moyo vose siifwanane; kuo na nyama ya muli ghwa mdamu, kuo na nyama moju ya nyamandu, kuo na nyama nzima ya nyonyi, na kuo na nyama moju ya makumba.

⁴⁰ Kuo na mili ya mlunguni na mili ya urumenguni; ela ubwaa ghwa ilya mili ya mlunguni ghwanachumbane na ubwaa ghwa ilya mili ya urumenguni.

⁴¹ Kuo na ubwaa ghumoju ghwa ijua, ubwaa ghumoju ghwa mwezi na ubwaa mzima ghwa ndonde; na hata ndonde zenyi zio na machumbano kele ubwaa ghwawe.

⁴² Hung'u niko ikalagha ngelo wafwile wezukisogho. Ngelo muli ghuzikogho ni ghohakilika, ngelo ghuzukisogho ni ghokala moyo.

⁴³ Ngelo ya muli kuziko ghwanawase na ni mnyonge; ngelo yezukiso ghujekala ghwaloli na ghwa ndighi.

⁴⁴ Ngelo yeziko ni muli ghooneka, ngelo yezuso ghujekala muli ghwa Roho. Fulo kuo na muli ghuonekanagha na kuwo na muli ghwa roho.

⁴⁵ Kwani Mawandiko gha Kuela ghaghora, “Mundu wa hambiri Adamu wanaumbilo kakala moyo,” ela, Adamu wa kudua ni Roho yefunya umana.

⁴⁶ Ela ghulya muli ghwa roho sigho ghungi ghukayayagha sala ghulya muli ghooneka, nao ima ghuje ghulya ghwa Roho.

⁴⁷ Adamu wa hambiri wanajile kufuma msangeni, odeilo kwa msanga; Adamu wa kaili wanafumile Mlunguni.

⁴⁸ Walye weo wa msanga wanafwanane na ulya adeilo kwa msanga: walye weo wa mlunguni wanafwanane na ulya afumile mlunguni.

⁴⁹ Na selyi kwenyi tarwara ifwani lya mundu adeilo kwa msanga, niko kwenyi tirwaragha ifwani lya Mundu afumile mlunguni.

⁵⁰ Selyi nighoragha wana wakwetu, ni hung'u, ichi chideilo kwa muli na bighati sichidimagha kupata Uzuri ghwa Mlungu, na chehaita sichidimagha kupata kulemo ni kuhaita.

^51-52 Sikizileni nimughorere fulo ivisike: Itose sitifwighagha kungi, ela ngelo tarumbeta ya kudua yakwito, tijeghalulo itose, iyo shwa ng'weri, sa kukunya kwa iziso. Kwani ilyi tarumbeta yakwito, walye wafwile wejezuka na lyingi siwafwe sena, nesi itose tijeghalulo.

⁵³ Kwani ughu ghovunda ni suti ghughalulo kukala sighovundagha, na ughu ghufwighagha ni suti ghughalulo kukala sighofwighagha.

⁵⁴ Kwa hung'u ilyi muli ghovunda ghwaghaluka kukala sighovundagha, aho Mawandiko gha Kuela ghekatilagha: “Kifwa, chahaitiso, usimi ghwapatikana.”

⁵⁵ “Kifwa, Ghuo hiyo usimi ghwako? Kifwa, Ghuo hiyo usungu ghwako?”

⁵⁶ Usungu ghwa kifwa ni kaung'a, na ndighi za kaung'a ni sheria.

⁵⁷ Ela Mlungu aliko uyu atihawagha kusima kwa ngila ya Bwana wetu Jesu Kristo.

⁵⁸ Kwa hung'u, wana wakwetu washayo, mangeni na simwanyavurike, mutumikileni Bwana kwa chadi ngelo zose, kwani mwamanya kamba kazi mudeagha kwa undu ghwa Bwana si nduu ingi.