1 Wakorintho 12 - UVORO GHWALOLI KWA WANDU WOSE

Manosi kufuma kwa Roho wa Kuela

¹ Ndamu wana wakwetu, kwa malagho gha manosi gha Roho, sishaile mulemo ni kumanya.

² Mwamanya kamba ilyi moluo simomweni Mlungu, molaghazo kwa ngila nyingi kele makosa ghetasa sanamu sizeghoragha.

³ Kwa hung'u nanashaile mumanye kamba sikuwesi mundungi alongozogho ni Roho wa Mlungu eghoragha, “Jesu awanyizo” na sikuwesi mundungi edimagha kughora, “Jesu ni Bwana”, ikakala selongozogho ni Roho wa Kuela.

⁴ Kuwo na machumbano gha mbari za manosi gha roho, ela ghanafumagha kwa Roho ulya mwenyi.

⁵ Kuwo na machumbano gha utumishi, ela etumikilogho ni Bwana mumojori.

⁶ Kuwo na udimo ghuchumbane ghotumika, ela Mlungu ni ulya mwenyi afunyagha udimo kwa wose kwa utumishi ghwawe.

⁷ Kila mundu wanahawogho ufunuo ghwa Roho kwa undu ghwa faida ya wose.

⁸ Roho yanahawagha mundu mumoju kughora na suku na kwa mundu mzima Roho ulya mwenyi wamuhawa kughora kwa kumanya.

⁹ Roho ulya mwenyi wamuhawa mundu mumoju idumusi na mzima wamuhawa ndighi zeboesa.

¹⁰ Roho wanahawagha mundu mumoju ndighi zedea wana mwakilimbita, na mzima kughora ilagho lya Mlungu; na kwa mzima kumanya manosi ghefumagha kwa Roho na sighefumagha kwa Roho. Mundu mumoju wamuhawa udimo ghoghora kwa viteto vizima na mumoju wahawo udimo ghofasiri viteto.

¹¹ Ela ni Roho ulya mwenyi mumojori uyu edeagha agha ghose selyi eshayagha, wamuhawa kila mundu inosi izima.

Muli ghumojori ghuo na viungo vingi

¹² Kwani selyi kwenyi muli ghumojori ghuo na viungo vingi, na viungo vose va muli hata ngera sani ni vingi ni muli ghumojori, ni hung'u kwenyi na Kristo.

¹³ Niko kwenyi nesi itose, tikalagha te Wayahudi ango Wagiriki, tikalagha te wasunyi ango te wakidina. Itose tanabatizo kukala muli ghumojori ni ulya Roho mwenyi, na tikahawo isi itose kumunwa Roho mumojori.

¹⁴ Kwani muli sighukalagha na kiungo kimojori sala vingi.

¹⁵ Ilyi kighulu chaghora, “kwa kukala imi simi mkonu ghungi, Imi simi wa muli kungi,” ilyi silyidimagha kuchidea sichakale cha muli.

¹⁶ Na Ilyi kisikilo chaghora, “kwa kukala imi simi iziso lyingi, Imi simi wa muli kungi,” ilyi silyidimagha kuchidea sichakale kiungo cha muli.

¹⁷ Ngera muli ghose gholuo iziso, ghosikilagha ije? Na ngera muli ghose gholuo kisikilo, ghonusagha ije?

¹⁸ Ela selyi iwo, Mlungu wanaikile kila kiungo cha muli selyi eshaile chikale.

¹⁹ Ngera muli ghose gholuo kiungo kimojori, kokalagha na muli ghungi?

²⁰ Niko ikakala kuo na viungo vingi, ela muli ni ghumojori.

²¹ Kwa hung'u iziso silyidimagha kughuuza mkonu, “Sio na haja newe!” Hata chongo sichidimagha kuuza kighulu, “Sio na haja newe!”

²² Kibalo chake, viungo vilya va muli vio vinyonge nivo sitedimagha kukala siteo navo,

²³ na vilya viungo va muli tighelelagha sivifweni ishima nivo tivilindagha kwa ishima, navo viungo va muli vilya vionekanagha kamba si valoli vingi nivo tivilindagha na ndighi,

²⁴ ngelo vilya viungo valoli siveo na haja sa iyo. Mlungu mwenyi niye aikile muli ngila mojori, kahawa ishima vilya viungo siveo na ishima.

²⁵ Kwa hung'u sikukalagha na kusarana kele muli, ela viungo vake vose vatunzana.

²⁶ Ilyi kiungo kimojori cha muli chasirima, viungo vose vasirimanya nacho; ilyi kiungo kimojori chaliko, viungo vose vaboelo.

²⁷ Ndamu inyo inyose ninyo muli ghwa Kristo, na kila mumoju ni kiungo chake.

²⁸ Kele ikanisa, Mlungu waika wose kele ulalo ghwake; kele ulalo ghwa hambiri watumo, kele ulalo ghwa kaili wana tondolo, na kele ulalo ghwa katatu walimu, nao walye wadeagha mwakilimbita, wekeirimiro ni walye weo na ndighi zeboesa makongo ango kuwarura wazima ango kuwalongoza ango kughora kwa viteto.

²⁹ Wose si watumo, ango wana tondolo ango walimu. Si wandu wose weo na ndighi zedea wana mwakilimbita,

³⁰ ango kuboesa makongo ango kughora na viteto vizima ango wedimagha kutafusiri malagho gheghoro.

³¹ Kwa hung'u kaleni na ngolo yepata manosi gha ighulu. Nemi ndamu nijemwonyeza ngila lyaloli kuchumba.