1 Wakorintho 11 - UVORO GHWALOLI KWA WANDU WOSE

¹ Irimeni mfwano ghwangu, selyi niirimagha mfwano ghwa Kristo.

Kubula chongo ngelo yetasa

² Namukasa kwa undu ghwa kunikumbuka ngelo zose na kwa kuirima mafundiso ghalye nimufundise.

³ Ela nanashaile mumanye kamba Kristo niye chongo cha kila mlume. Na mlume naye ni chongo cha muke, Mlungu naye ni chongo cha Kristo.

⁴ Kwa hung'u mlume kalomba ango kaeresa ilagho lya Mlungu abulile chongo wamufwisha waya Kristo.

⁵ Na muke kalomba ango kaeresa ilagho lya Mlungu sebulile chongo chake; wamufwisha waya mlume wake. Kwani sikuwesi machumbano kwake na muke ahariro chongo.

⁶ Kwani ngera muke sebulagha chongo chake, wadima hata kukushula sisiri. Na kwa kukala ni ilagho lya aibu kwa muke kuhara chongo chake ango kukushula sisiri ni kirani abule chongo chake.

⁷ Mlume siifweni abule chongo chake, kwa kukala waonyeza fwana na ubwaa ghwa Mlungu. Ela muke waonyeza ubwaa ghwa mlume.

⁸ Kwani mlume saumbilo kufuma kwa muke, ela muke wanaumbilo kufuma kwa mlume.

⁹ Hata mlume saumbilo kwa undu ghwa muke, ela muke wanaumbilo kwa undu ghwa mlume.

¹⁰ Ndamu kwa undu ghwa wana malaika, muke yanafweni abule chongo chake kuonyeza kamba uwo isi ya mlume wake.

¹¹ Ela sani hambiri ya Bwana muke sefwanagha sikweo mlume na mlume sefwanagha sikweo muke.

¹² Kwani selyi kwenyi muke adeilo kufuma kwa mlume, niko kwenyi na mlume avalogho ni muke, naye Mlungu niye aletagha vindu vose.

¹³ Zighaneni inyo wenyi ngera ni karakara muke kulomba Mlungu wanduni chongo chake sichebulilo.

¹⁴ Hata kuumbo kwenyi kwationyeza kamba kwa mlume kukala na sisiri ndele ni waya,

¹⁵ ela muke kukala na sisiri ndele ni kindu chekukasa; kwani wanahawilo sisiri eri zimubule.

¹⁶ Ela ngera mundungi ashaya kudea nganyi ighulu ya ilagho ilyi, nendeghora kamba isi hata makanisa gha Mlungu sitiwesi mirighido ingi.

¹⁷ Ela kele mafundiso agha simukumagha kungi, kwa kukala ngelo mwakoghana kutasa, mwadea ghawase kuchumba ghaloli.

¹⁸ Hambiri, naghorero kamba mwasarikana mafungu mafungu kele makoghano ghenyu, na nadumusa ghamoju ni fulo.

¹⁹ Kwani ni suti kukale na masarikano ghati yenyu eri walye wa fulo ghati yenyu waonekane mwazi.

²⁰ Ngelo mwakoghana ngila mojori, si kilalilo cha Bwana chingi mulyighagha.

²¹ Kwani mukelya, kila mumoju walya chakulya chake mwenyi, kwa hung'u wamoju weo njala na wazima wanaruwa.

²² Kwani simuwesi nyumba zelya na kunwa? Ango mondelyimenya ikanisa lya Mlungu na kuwafwisha waya wandu siwewesi vindu vingi? Ndamu nighore ije kwenyu? Nimukase kwa agha? Hata, Simukasagha!

Kilalilo cha Bwana

²³ Kwani imi nanapatile kufuma kwa Bwana ghalye mafundiso nimuhawile: kamba Bwana Jesu, kele kiro chilya afunyilo, owatile mkate,

²⁴ naye aghenda amfunyila Mlungu asanta kaghuvunja, keghamba, “Ughu ni muli ghwangu, ghuwo kwa undu ghwenyu; deeni hung'u kwa kunikumbuka imi.”

²⁵ Hung'u kwenyi kawata kikombe nyuma ya kilalilo, keghamba, “Kikombe ichi ni ilagano iwishi lyangizo muhuri kwa bighati yangu. Deeni hung'u kila andu mwanwa, kwa kuniririkanya imi.”

²⁶ Kwani kila ngelo mulyighagha mkate ughu na kunwa kikombe ichi mondeeresa kifwa cha Bwana hata eje.

²⁷ Kwa hung'u uyo mundu wose elyighagha mkate ghwa Bwana ango kunwa kikombe cha Bwana sefweni ujekala na makosa ighulu ya muli na bighati ya Bwana.

²⁸ Kwa hung'u mundu akuzighane iye mwenyi jako, nao alye mkate na kunwa kufuma kele kikombe.

²⁹ Kwani ilyi mundungi alya mkate na kunwa kufuma kele kikombe setambulagha chausa cha muli ghwa Bwana, ngelo yelya mkate na kunwa kufuma kele kikombe, wakutaghanya mwenyi kwa kulya na kunwa.

³⁰ Ni kwa undu ughu wengi wenyu ni wanyonge na wakongo na wamoju wafwa.

³¹ Ilyi takuzighana isi wenyi kihambiri, sititaghanyogho ni Mlungu.

³² Ela ngelo titaghanyogho ni Bwana, tendefundiso eri kamba sitejetaghanyo ngila mojori na urumengu.

³³ Kwa hung'u wana wakwetu, ngelo mukoghanagha kulya kilalilo cha Bwana, mudafwaneghe.

³⁴ Na ngera mundungi ashaho ni njala alye kaya kwake, eri simojeja kutaghanyo ni Mlungu ngelo yekoghana. Ela ighulu ya ghalye malagho mazima nijeghora ngelo neja.