1 Wakorintho 10 - UVORO GHWALOLI KWA WANDU WOSE

Maonyo ighulu ya milungu

¹ Wana wakwetu, nanashaile mukumbuke kamba wana ake weluwanyo na Musa, wose weluo isi ya ulindiri ghwa iwengu, na wose wakawambuka banana Bahari ya Shamu.

² Nawo kele iwengu na kele bahari wakabatizo wose sa wairimi wa Musa.

³ Wose wakalya chakulya chilya chenyi cha kiroho.

⁴ Na wakanwa kindu chilya chenyi chenwa cha kiroho. Wakanwa kufuma iwe lya roho lyilya lyeghendanye nawo, nalyo lyilya iwe lyeluo ni Kristo mwenyi.

⁵ Ela hata nyuma ya agha ghose, Mlungu saboelelo ni wengi wa wana ake, na kwa hung'u mili yawe ifwile ikasaghiso kireti.

⁶ Ndamu, malagho agha ghose ni fwana kwetu, ghationya sitashaye malagho ghawase selyi weshaile,

⁷ hata sitatase milungu, selyi wamoju wawe wadeile. Mawandiko gha Kuela ghaghora, “wandu wakakala kitembo kulya na kunwa na wakauka kuvina.”

⁸ Ni suti sitangile kele kuzinga selyi wamoju wawe weluo na kwa ijua imojori wakagwa na wakafwa wandu elfu mirongo mili na ndatu.

⁹ Ni suti sitamtime Bwana selyi wamoju wawe wamutimile nawo wakaulagho ni nyoka.

¹⁰ Ni suti sitanung'unike selyi wamoju wawe wanung'unike na wakahaitiso ni ulya Mhaitisi.

¹¹ Malagho agha ghose ghanadeike kwawe kukala fwana kwa wazima, nagho ghanawandiko sa maonyo kwetu. Kwani tendekala kele ngelo ya kavui na kudua.

¹² Kwa hung'u uyu ekuririkanyagha mwenyi wanamangile akulinde kamba sagwe.

¹³ Matimo ghose ghamupatagha ni ghalye ghawapatagha wadamu. Ela Mlungu ni mdumusiliki, naye sejemusigha mtimo kuchumba ndighi zenyu zemanga; ela ngelo matimo ghekujagha ujemuhawa ndighi zerumaghia na kumhawa ngila yefuma.

¹⁴ Kwa hung'u washayo, kuikeni kulele na kutasa milungu.

¹⁵ Nendeghora nenyo sa wandu muo wa akili, taghanyeni inyo wenyi agha naghora.

¹⁶ Kikombe titumiagha kele kilalilo cha Bwana na timukasagha nacho Mlungu; ngelo yenwa, takala na ungaro kele Bighati ya Kristo. Na mkate tivunjagha, ngelo tighulyighagha, tendekala na ungaro na muli ghwa Kristo.

¹⁷ Kuo na mkate ghumojori kwetu itose, hata ngera tio wengi, nisi muli ghumojori, kwani itose takaranya mkate ghulya ghwenyi.

¹⁸ Zighaneni wandu wa Israeli, walye walyighagha kizangauna chifunyogho kele mazabahu wadea ungaro na utumishi ghwa Mlungu.

¹⁹ Ndamu fulo ni kughora kamba milungu ango chakulya chifunyilo sadaka kwa milungu ni kindu chingi?

²⁰ Hata! Ilagho nighoragha ni kamba chilya chifunyilo kizangauna kele mazabahu gha wandu siwemweni Mlungu chanafunyilo kwa mashetani, na si kwa Mlungu. Na imi sishaile mkale na ngaro na mashetani.

²¹ Simudimagha kunwa kufuma kikombe cha Bwana na sena munwe kele kikombe cha mashetani. Simudimagha kulya kele meza ya Bwana na sena mulye kele meza ya mashetani.

²² Ango tendeshaya kumdea Bwana kukala na iziso? Tighelelagha kamba tana ndighi kumchumba iye?

²³ Wandu wamoju wanaghoragha, “Tanadumusilo kudea kindu icho chose” Agho ni fulo, ela si malagho ghose gheo ghaloli. Tadumusilo kudea kindu, ela si kila kindu chio cha kuwarura.

²⁴ Mundungi salole faida yake mwenyi, ela alole faida ya wambawe.

²⁵ Mwadima kulya nyama iyo yose itaghogho sokoni sikweo na kukotela na keri keri zingi.

²⁶ Kwani Mawandiko gha Kuela ghaghora, “Urumengu na vindu vose vio amweni kwake ni mali ya Bwana.”

²⁷ Ilyi mundu sedumuse amukaribisha kulya naye na mwadumusila kughenda, lyeni icho chose chijeiko hambiri yenyu sikweo na kukotela kwa undu ghwa wasi wasi ngoloni kwenyu.

²⁸ Ela ilyi mundungi amuuza, “Chakulya ichi chanafunyilo sadaka kwa milungu,” aho simwalye icho chakulya, kwa undu ghwa ulya mundu amughorera na kwa undu ghwa wasi wasi ghwa ngolo zenyu.

²⁹ Naghora, si kwa undu ghwa ngolo yako, ela kwa undu ghwa ngolo ya ulya akughorera. Mundu wadima kukotela, “Ndamu kudani uhuru ghwangu ghodea malagho ghuimo kukala ni wasi wasi ghwa ngolo ya mundu mzima?

³⁰ Ikakala namukasa Mlungu kwa undu ghwa chakulya changu, kudani mundu anifunye makosa kwa undu ghwa chakulya namufunyila Mlungu asanta?”

³¹ Kwa hung'u kila ilagho mudeagha, ngera ni kulya ango kunwa, deeni ghose kwa undu ghwa ubwaa ghwa Mlungu.

³² Simwawakosese Wayahudi ango wandu wa mbari nzima ango ikanisa lya Mlungu.

³³ Deeni selyi nideagha; kwa kutima kuwaboela wandu wose kwa malagho ghose nideagha, sikweo na kughelela ghaloli, sala ghaloli kwa wose, eri wapate kukila.