1 Wakorintho 1 - UVORO GHWALOLI KWA WANDU WOSE

¹ Imi Paulo, nipang'ilo kwa mashayo gha Mlungu kukala mtumo wa Kristo Jesu, na wakwetu Sosthene,

² Tawandika kwa ikanisa lya Mlungu lyio Korintho, walye waeleso kwa kuwataniso na Kristo Jesu, na wapang'ilo kukala wandu wa Kuela wa Mlungu, ngila mojori na wandu wose kila andu awa wamulombagha Bwana wetu Jesu Kristo, ewo Bwana wawe na wetu.

³ Mbazi na sere ifumagha kwa Mlungu Aba na kwa Bwana Jesu Kristo ikale kwenyu.

Mibaraka kwa kukala amweni ya Kristo

⁴ Namukasa Mlungu wangu ngelo zose kwa undu ghwenyu kwa undu ghwa mbazi amhawile kwa ngila ya Kristo Jesu.

⁵ Kwani kwa kuwataniso na Kristo, mwakala wazuri wa kila kindu, mwahawo kuchila kose na kumanya kose.

⁶ Kwani, ushuhuda ighulu ya Kristo ghwamanga gii amweni kwenyu,

⁷ kwa hung'u simugotuwilo ni kindu chingi cha roho ngelo mumudafwagha Bwana wetu Jesu Kristo kufunukulo.

⁸ Iye ujemulinda inyo hata kudua, eri simwakale na ikosa lyingi kele Ijua lya Bwana wetu Jesu Kristo.

⁹ Mlungu ni wa kudumuso. Naye niye amupang'ile kukala na ungaro na Mwana wake Jesu Kristo Bwana wetu.

Kusarikana kele Ikanisa

¹⁰ Nendemuvoya wana wakwetu, kwa Izina lya Bwana wetu Jesu Kristo, msikilane kele ghalye mughoragha, eri sikwakale na kusarana ghati yenyu. Muwatane, mkale na maririkanyo ghamojori na ilengo imojori.

¹¹ Kwani wana wakwetu, nanaghorerero mwazi ni wandu wa nyumba ya Kloe, kamba kuwo na marashano ghati yenyu.

¹² Ela nendeghora hung'u: kila mumoju wenyu waghora kikwake. Mumoju waghora, “Imi nimi wa Paulo,” mzima “Imi nimi wa Apolo,” mzima “Imi nimi wa Kefa,” na mzima “Imi nimi wa Kristo”.

¹³ Ado Kristo wasarika? Ado Paulo wanawambilo kwa undu ghwenyu? Ado mwanabatizo kwa izina lya Paulo?

¹⁴ Namufunyila Mlungu asanta kwa kukala simubatize mundungi wenyu sala Krispo na Gayo.

¹⁵ Kwa hung'u mundungi sedimagha kughora kamba wanabatizo kwa izina lyangu.

¹⁶ (Ee fulo, sena nanabatize Stefanas na wandu wa nyumba yake, ela siririkanyagha kamba nanabatize mundungi sena.)

¹⁷ Kristo sanitumile kubatiza, ela kuchila Ilagho Lyaloli, na nichile sikweo na kuirima kughora kwa akili za kidamu eri ndighi ya kifwa cha Kristo msalabeni sichakale kituu.

Kristo ni ndighi na suku ya Mlungu

¹⁸ Kwani ilagho lya Kifwa cha Kristo kele msalaba ni uzimu kwa walye wehaitagha, ela kwetu isi tikizogho ni ndighi ya Mlungu.

¹⁹ Mawandiko gha Kuela ghaghora, “Nijehakila suku za walachu, na kukumba mbali kumanya kwa walachu.”

²⁰ Ndamu uwo hiyo mlachu? Uwo hiyo mwalimu wa Sheria. Uwo hiyo mdei nganyi wa urumengu? Mlungu wadea suku za urumengu zikale uzimu.

²¹ Kwani Mlungu kwa suku yake, kawadea wandu siwamumanye kwa ngila ya suku zawe. Ela ikamuboela Mlungu kwa uzimu ghulya tighuchilagha kuwakiza walye wadumusa.

²² Wayahudi wanashaile wana mwakilimbita na Wagiriki wahada suku.

²³ Ela isi, tamchila Kristo awambilo, agha kwa Wayahudi ni kikwaliso na kwa wandu wa mbari nzima ni uzimu;

²⁴ ela kwa walye wapang'ilo ni Mlungu, wakalagha Wayahudi ango Wagiriki, Kristo ni ndighi ya Mlungu na suku ya Mlungu.

²⁵ Kwani ghalye gheonekagha kukala uzimu ghwa Mlungu, ni gha ulachu kuchumba suku ya mdamu; na ghalye gheonekagha kukala unyonge ghwa Mlungu, ghana ndighi kuchumba ndighi ya mdamu.

²⁶ Wana wakwetu, kumbukeni selyi moluo ngelo Mlungu emupang'ile. Wengi wenyu simwoluo na suku ango na udimo ango na cheo,

²⁷ ela Mlungu wanasaghule ghalye gheririkanyo ni urumengu kukala uzimu, eri afwishe waya walachu, na kasaghula ghalye gheririkanyo ni urumengu kukala manyonge, eri afwishe waya weo na ndighi.

²⁸ Mlungu wanasaghule vilya va isi na vimenyogho ni urumengu na kuono si kindu chingi, eri avihaitise vilya urumengu vighelelagha vanafweni.

²⁹ Kwa hung'u mundungi sakukase hambiri ya Mlungu.

³⁰ Ela Mlungu niye amwatanisa inyo na Kristo Jesu, na ni Mlungu amdea Kristo kukala suku yetu. Kwa ngila yake tapataniso na Mlungu, takala wandu wa Kuela wa Mlungu na tadeo kukala huru.

³¹ Kwa hung'u selyi Mawandiko gha Kuela ghaghoragha, “Uyo wose ashaile kukukasa, ni suti akukase na ghalye Bwana adeile.”