1 Timotheo 6 - UVORO GHWALOLI KWA WANDU WOSE

¹ Wasunyi wose yanafweni wawahawe ishima wana bwana wawe, eri mundungi saghore laghelaghe ighulu ya izina lya Mlungu na mafundiso ghetu.

² Walye wasunyi weo na wana bwana Wakristo siwawamenyese, kwa kukala ni wana wakwawe. Ela yanafweni wawatumikile kirani kuchumba, kwa kukala walye wepatagha faida kwa kazi yawe, ni wandu wadumuse na wawashaile. Ufundise na kuchila malagho agha.

Mafundiso gha ndimi na uzuri ghwa fulo

³ Uyo wose efundisagha mafundiso mazima na sedumusilagha malagho gha fulo gha Bwana wetu Jesu Kristo, ngila mojori na mafundiso gha dini yetu,

⁴ wajulo ni kukukasa na saweni kindu chingi. Wajulo ni tamaa iwase ya nganyi na kurashana kwa malagho, na agha ghaleta iziso, marashano, vitukano, maghelelo ghawase,

⁵ na nganyi sizeduwagha kufuma kwa wandu vongo vawe sivedeagha kazi na siwewesi fulo. Wanaririkanyagha kamba dini ni ngila yepata uzuri.

⁶ Fulo dini yamudea mundu kukala mzuri ilyi akatila na vilya eo navo.

⁷ Kwani sititute kindu chingi aha urumenguni na sititwalagha kindu chingi kufuma urumenguni.

⁸ Kwa hung'u tikakala na chakulya na nguo, ivo vatikata.

⁹ Ela walye washaile kukala wazuri wangila matimoni na kuwato ni mtegho ghwa malagho mengi gha uzimu na tamaa ziwase zidimagha kuwagwisha kele kuhakilika na kuhaita.

¹⁰ Kwani kushaya pesa niko asili ya kila mbari ya malaghelaghe ghose. Nawo wandu wengi wazishaile walaghalagha na kukala kulele na idumusi na kuvunja ngolo zawe kwa masirimi mengi.

Malaghizo kwa Timotheo

¹¹ Ela uwe mundu wa Mlungu, kulinde na malagho agha ghose. Uirime hachi, ueli, idumusi, mashayo, kurumaghia na umbole.

¹² Kimbila naiseghe kwa kukimbilila idumusi, eri usime na kupata umana ghwa kale na kale; kwani ni kwa undu ghwa umana ughu Mlungu akupang'ile ngelo oghorire idumusi lyake hambiri ya mashahidi wengi.

¹³ Hambiri ya Mlungu uyu ahawagha vindu vose umana, na hambiri ya Kristo Jesu uyu aghorire idumusi lyake hambiri ya Pontio Pilato.

¹⁴ Nendekuuza uwate malaghizo agha kwa udumusiliki sikowesi makosa hata lyilya Ijua Bwana wetu Jesu Kristo ejeoneka.

¹⁵ Kuoneka kwake kukujagha kwa ngelo ifweni iikilo ni Mlungu mubarikio na Mtawala, Mzuri wa Wazuri na Bwana wa Mabwana.

¹⁶ Iye ekeng'weri wanakalagha moyo majua ghose. Naye wanakalagha kele mlangazi na sikuwesi mundungi edimagha, kumusughutila. Sikuwesi mundungi amwonile lyingi na sikuwesi mundungi edimagha kumwona. Kwake kukale ishima na ubwaa ghwa kale na kale. Ameni.

¹⁷ Wauze wandu weo wazuri wa vindu siwakukase na va ughu urumengu, ela waike kukoserea kwawe kwa Mlungu uyu awahawagha wandu vindu vose vewadea waboelo.

¹⁸ Wauze wadee ghaloli na kukala wazuri kele madeo ghaloli; wekekala na ishima, hata wadime kuwasarira wazima.

¹⁹ Kwa ngila iyi wakuikile mali yewaghala msingi ghwaloli ghwa ngelo ikujagha. Nao wapate umana ghuo umana ghwa fulo

²⁰ Ee Timotheo, linda kirani agha uikililo. Sighana na maheleo gha kidamu na nganyi za uzimu ziitogho ni wandu wamoju, “Kumanya.”

²¹ Kwani wandu wamoju waghora weo nako na kwa ngila iyo kulaghaza idumusi. Mbazi ikale nenyo inyose.