1 Timotheo 5 - UVORO GHWALOLI KWA WANDU WOSE

Kazi kwa awa wadumuse

¹ Swamukemele mghosi, ela umughorere sa tatio. Watawana uwadeile sa wana wakwenyu wa kialume,

² wakekulu sa wana meo, na wake wa irika sa wana wakwenyu wa wake, kwa ueli ghose.

³ Wahawe ishima wake wafwililo ni walume awa weo wenyi.

⁴ Ela muke afwililo ni mlume na eo na wana ango wajukulu, awo yanafweni wakufundise kudea selyi dini ighoragha kwa kinyumba chawe, na kwa ngila iyi wawalipe wavali na wavali wa wavali wawe, kwa kukala agha nigho ghamuboelagha Mlungu.

⁵ Muke afwililo ni mlume wake ewo mwenyi, sewesi mundu womuzighana wanaikagha ikosereo lyake kwa Mlungu, naye wanamlombagha Mlungu kiro na msenya keshaya amwarure.

⁶ Ela muke afwililo ni mlume wake eirimagha maboelo gha urumengu wanafwile hata ngera sani uwo moyo.

⁷ Waghorere malagho agha, eri mundungi wawe saono na makosa.

⁸ Ela ngera mundungi sewazighanagha wandu wa kichuku chake, kuchumba wa nyumba yake, walyikana idumusi na wanawase kuisa mundu sedumuse.

⁹ Swamwandike muke afwililo ni mlume seketi miaka mirongo mitandatu, akale ausilo kamojori;

¹⁰ na wa nguma yaloli, muke alelile wana wake kirani, eluo kewahokera wagheni, na eluo kewawarura wandu wa Mlungu; eluo kewawarura wandu weluo na kusirima na akufunyile kudea ghaloli kwa kila ngila.

¹¹ Ela uleghe kuwawandika wake wa irika wafwililo ni walume wawe, kwani wadima kuwato ni tamaa yeuso na wamughaluke Kristo,

¹² na hung'o wakale na makosa ghevunja malagano walagane naye hambiri.

¹³ Ngila mojori na agho wakufundisa kumalila ngelo zawe na kumaramara kufuma nyumba hata nyumba; ela laghelaghe na ndighi, ni kuguna wandu na kughora malagho gha wandu wazima siyefweni waghaghore.

¹⁴ Kwa hung'u ndeona ni kirani wake wafwililo ni walume wawe weo wa irika wauso, wavale wana, na kutunza nyumba zawe, na kwa ngila iyi tiime wamaiza wetu kughora laghelaghe ighulu yetu.

¹⁵ Kwani wake wamoju wafwililo ni walume wawe wamalila kulaghaya na kumwirima Shetani.

¹⁶ Ngera muke ungi Mkristo eo na wake wafwililo ni walume wawe wa kichuku chake, awatunze, eri satukise ikanisa msigo, kamba ikanisa lyiwazighane wake wafwililo ni walume wawe weo keng'weri.

¹⁷ Waghosi wadeagha kazi kirani sa vilongozi, yanafweni wahawo malipo mandu maili, hasa walye weo na chadi kele kuchila na kufundisa.

¹⁸ Kwani Mawandiko gha Kuela ghaghamba, “Swafunge ng'ombe mlomu ngelo uitumiagha kwa kukwita viro,” na “Mdei kazi wanafweni ahawo mshahara ghwake.”

¹⁹ Swadumusile mashitaki gha mughosi ikakala sikweo na mashahidi waili, ango watatu.

²⁰ Walye wedeagha kaung'a, uwakemele hambiri ya wandu wose, eri wazima waoghe.

²¹ Nendekuuza hambiri ya Mlungu na Kristo Jesu na wana malaika wasaghulo, uwate malaghizo agha sikweo na kuwasila ango kuboela mundungi

²² Swakale na shoshowa kuikilila mundungi mkonu kwa kazi ya Bwana, hata swangile kele kaung'a ya mundungi. Kuike uelile.

²³ Swanwegheghe meji ghenyi, ela unwegheghe divei njache kwa undu ghwa kifu chako na kwa kukala mkongo kila ngelo.

²⁴ Kaung'a za wandu wamoju zio mwazi nazo zaoneka na zaghenda hambiri yawe kele kutaghanyo, ela kaung'a za wamoju zaoneka uko nyuma.

²⁵ Niko kwenyi na madeo ghaloli ghanaonekagha mwazi mwazi na ngera sigheonekagha mwazi, sighadimagha kuvisika.