1 Timotheo 4 - UVORO GHWALOLI KWA WANDU WOSE

Walimu wa ndimi

¹ Roho waghora mwazi kamba ngelo ikujagha, wandu wamoju wesighagha idumusi, wasikile roho za ndimi na kuirima mafundiso gha mashetani.

² Mafundiso sa agha ghaereso ni wandu wa ngolo mbili wa ndimi, wafwile ngoloni sa kamba wendeisho na chuma.

³ Wandu awa wafundisa kamba ni laghelaghe kulola na kulya vakulya vimoju. Ela Mlungu niye aumbile ivo vakulya vilyighogho ni wandu wadumuse na waweni fulo kwa kufunya asanta.

⁴ Kwani kila kindu chiumbilo ni Mlungu ni chaloli na chingi sichifweni chilegho, ela vose vihokero kwa malombi ghefunya asanta.

⁵ Kwani ilagho lya Mlungu na malombi vachielesa chidumusilo ni Mlungu.

Mtumishi waloli wa Kristo Jesu

⁶ Ilyi wawahawa wana wakwetu malaghizo agha, ukalagha mtumishi waloli wa Kristo Jesu, koghutiso roho ni malagho gha idumusi na mafundiso gha fulo agha oluo koghairima.

⁷ Ela sighana na ngano sizefweni za wakekulu na sizeo za dini. Ukuilisise kukala ki-Mlungu.

⁸ Mailiso gha muli gheo na faida kwa muli, ela mailiso gha roho gheo na faida kwa kila ngila, kwa kukala ghatihawa ilagano lya umana ughu na ghukujagha.

⁹ Agha ni malagho gha fulo ghafweni ghadumuso na kuwato kamare.

¹⁰ Takusirimisa na kudea kazi kwa ndighi, kwa kukala tio na ikosereo kwa Mlungu ewo moyo, Mkizi wa wose na kuchumba awa wadumusa.

¹¹ Wahawe agha malaghizo na mafundiso.

¹² Swadumuse mundungi akumenyese kwa kukala nuwe mundu wa irika, ela ukale fwana ya awa wadumusa kele maheleo, mughendo, mashayo, idumusi na ueli.

¹³ Utumie ngelo yako na udimo kwa kushoma Mawandiko gha Kuela na kuchila na kufundisa hata nije.

¹⁴ Swasighe inosi lya roho uwo nalyo, ilyo uhawilo kwa malagho gha wana tondolo na kuikililo mikonu ni waghosi.

¹⁵ Ukuilisise malagho agha na ukufunye kughadea eri wose waone maendeleo ghako.

¹⁶ Kulinde uwe mwenyi na ulinde mafundiso ghako. Juzila kudea malagho agha. Kwani kwa kudea hung'u, ujekukiza uwe mwenyi na walye wekusikizilagha.