1 Timotheo 3 - UVORO GHWALOLI KWA WANDU WOSE

Vilongozi wa Ikanisa

¹ Malagho agha ni gha fulo: Ngera mundu ashaya kukala Askofu, washaya kazi yaloli.

² Askofu ni suti akale mundu sewesi makosa, akale mundu wa muke mumojori, adeagha malagho kwa kiasi, akumangisagha mwenyi, adeagha malagho kirani, ewo na ishima na edimagha kufundisa,

³ sakale munaruwi ango wa kondo, ela akale mundu wa mbole na wa sere, na sakale mundu oshaya pesa,

⁴ akale mundu eitunzagha nyumba yake kirani na ewadeagha wana wake wamusikile kwa ishima.

⁵ Kwani mundu sedimagha kutunza nyumba yake yenyi udimagha ije kulinda Ikanisa lya Mlungu?

⁶ Siifweni akale mundu adumuse kafwani, eri sejeja kukukasa na kutaghanyo sa shetani.

⁷ Wanafweni akale mundu ahawogho ishima ni wandu wa shighati ya Ikanisa, eri sejeghoro laghelaghe na kugwa kele mtegho ghwa Shetani.

Wawaruri wa Ikanisa

⁸ Wawaruri nawose, wakale wandu waloli na siwakale wa lolololo, siwakale wanwi divei na ndighi ango wandu washaile pesa na ndighi.

⁹ Wanafweni wawate putu gheo fulo ghavisike gha idumusi kwa ngolo ielile.

¹⁰ Nawo yanawafweni watimo jako, na ilyi wasima, watumike sa wawaruri.

¹¹ Wake wawe nawose ni suti wakale wake waloli na siwakale waguni wandu, ela wekumanziragha na wadumusiliki kwa kila kindu.

¹² Wawaruri wakale wandu wa muke mumojori na wedimagha kutawala wana na nyumba zawe kirani.

¹³ Kwani walye wawaruri wedeagha kazi yawe kirani wekupatilagha ghaloli na wadima kughora idumusi lyawe kwa Kristo Jesu sikowesi wogha

Ngasu mbwaa

¹⁴ Nendekuwandikila barua ii, ela nio nikekoserea kuja kumwona kafwani.

¹⁵ Ela ilyi namuka luma, barua ii imumanyisagha selyi ifweni mukale kele nyumba ya Mlungu, nilyo ikanisa lya Mlungu ewo moyo, uyu ewo nguzo na musingi ghwa fulo.

¹⁶ Sikuwesi ungi edimagha kukana ubwaa ghwa ngasu ya dini yetu: Wanaonekane kwa iumbo lya mdamu, kaonyezo kukala mhachi ni Roho, na kaono ni wana malaika. Kachilo kele mbari, kadumusilo andu kose urumenguni, na kajoso noko ighulu mlunguni kwa ubwaa.