1 Timotheo 2 - UVORO GHWALOLI KWA WANDU WOSE

Utasi kele Ikanisa

¹ Hambiri ya malagho ghose, mdee malombi, malombi ghevoya na kumfunyila Mlungu asanta kwa undu ghwa wandu wose;

² kwa wazuri na wose weo na nguma, kamba tikale andu kuo kima na kwa sere, ngila mojori na kumuhawa Mlungu ishima na mughendo ghwaloli.

³ Agha nigho ghaloli, ghamuboelagha Mlungu Mkizi wetu,

⁴ uyu ashaile wandu wose wakile na kuimanya fulo.

⁵ Kwani kuo na Mlungu mumojori na kuo na mumojori ampatanisagha Mlungu na mdamu, mdamu Kristo Jesu,

⁶ uyu akufunyile mwenyi kuwakombola wadamu wose. Nagho ughu ni ushuhuda kwa ngelo yefwana, kamba Mlungu wanashaile wandu wose wakile.

⁷ Kwa undu ughu nanasaghulo nikale mtumo na mwalimu wa mbari nzima, nierese uvoro ghwa idumusi na fulo. Nendeghora fulo; na si ndimi!

⁸ Nanashaile ilyi mwakoghana andu kungi kulomba, walume walombe. Wakale wandu wakufunyile kwa Mlungu na wanule mikonu yawe wekelomba, siwakale na hare ango nganyi.

⁹ Nanashaile wake nawose wakale wa ishima na akili kele marwari ghwawe, warware kirani, siwaluke sisiri ango kurwara zahabu ango lulu ango nguo za zoghori mbwaa,

¹⁰ ela wadee malagho ghaloli ghawafweni wake weo na dini.

¹¹ Wake wakufundise kunyamala na kukuseleza.

¹² Siwadumusilagha wafundise ango wakale na nguma ighulu ya walume, ni suti wanyamale.

¹³ Kwani Adamu wanaumbilo hambiri, nao kaumbo Hawa.

¹⁴ Na hata siyeluo ni Adamu ungi aembiloembilo, ela ni muke aembiloembilo kavunja sheria ya Mlungu.

¹⁵ Ela muke ujekizo kwa kuvala wana, ikakala ekalagha kele idumusi na mashayo na wa kuela, ngila mojori na kukuseleza.