1 Timotheo 1 - UVORO GHWALOLI KWA WANDU WOSE

¹ Imi Paulo, mtumo wa Kristo Jesu kwa mlomu ghwa Mlungu Mkizi wetu na kwa Kristo Jesu eo ikosereo lyetu,

² Nawandika kwa Timotheo mwana wangu wa fulo kele idumusi: Mbazi, kufwilo waya, na sere ya Mlungu Aba na Kristo Jesu Bwana wetu ikale kwako.

Maonyo ighulu ya mafundiso gha ndimi

³ Nanashaile ukale Efeso, selyi nikuuzile ngelo neluo nikeghenda Makedonia. Kuo na wandu wamoju aho wafundisagha mafundiso gha ndimi na ni suti uwauze wasighe.

⁴ Wauze wasighane na ngano na malagho mazima mengi gha wana akee, ghedimagha kuleta nganyi; nagho sighetumikilagha kungi mpango ghwa Mlungu, ughu ghumanyikagha kwetu kwa ngila ya idumusi.

⁵ Chausa cha kughora hung'u ni mashayo ghefumagha kele ngolo ielile na yaloli iwo na idumusi lya fulo.

⁶ Wandu wamoju walaghaya kwa undu ghwa maheleo gha uzimu.

⁷ Wanashaile kukala walimu wa Sheria za Mlungu, ela siwemanyagha agha weghoragha sikwewo na wogha.

⁸ Tamanya Sheria ni yaloli ilyi yatumio karakara.

⁹ Ni suti ikumbuko kamba Sheria zanaikilo, si kwa undu ghwa wandu waloli kungi, ela wavunji Sheria na walaghelaghe, siweo wa Mlungu na wakaung'a, walye siweo wa dini ango wa roho, walye weulaghagha wana tatie ango wana mee na waulaghi.

¹⁰ Wandu wazingagha, wezingagha kinyume, waiwi wandu, waghori ndimi na wafunyi ushuhuda ghwa ndimi ango wadeagha malagho sighewo gha mafundiso ghaloli.

¹¹ Mafundiso agho ghaloli ghapatikana kele Injili iyo imi niikilo kuichila, Lyilya Ilagho Lyaloli lya ubwaa na lyibarikio ni Mlungu.

Kumfunyila Mlungu asanta kwa mbazi yake

¹² Namufunyila asanta Kristo Jesu Bwana wetu kwa kunihawa ndighi zedea kazi. Namufunyila asanta kwa kuniona nanafweni na kwa kunisaghula nimtumikile,

¹³ hata ngera sani uko hambiri nanaghorire laghelaghe ighulu yake na kumutirira na kumutukana. Ela Mlungu kanifwila waya, kwa kukala seluo na idumusi, niseweni na nisemanyagha agha nideagha.

¹⁴ Ela mbazi ya Bwana wetu ikanitikila kwa ungi, ikanihawa idumusi na mashayo gheo kwetu tiwatane na Kristo Jesu.

¹⁵ Malagho agha ni gha fulo, na ghanafweni ghadumusilo kamare, kamba Kristo Jesu wanajile urumenguni kuwakiza wakaung'a. Na imi nimi mkaung'a aisile wose,

¹⁶ ela Mlungu kanifwila waya, eri Kristo Jesu aonyeze kurumaghia kwake kose kwa kunikiza imi mkaung'a aisile wose, kamba nikale fwana ya wose wedumusagha na kupata umana.

¹⁷ Ndamu kwa Mzuri wa kale na kale, sedimagha kuhakilika na seonekanagha, Mlungu mumojori, kwake kukale ishima na Ubwaa kwa kale na kale! Ameni.

¹⁸ Mwanwangu Timotheo, nendekuhawa ilaghizo ilyi ulyiwate kwa kuirimana na malagho ghaghoriro ni wana tondolo ighulu yako ko hambiri. Ghatumie malagho agho sa mata yelwana kirani.

¹⁹ Kowata idumusi lyako kwa ngolo yaloli. Wandu wamoju kwa kulegha kusikila gheo ngoloni kwawe, wahakila idumusi lyawe.

²⁰ Wamoju wawe ni Humenayo na Alekzanda. Awo nawahawana kwa Shetani eri wakufundise siwamtukane Mlungu.