1 Petro 5 - UVORO GHWALOLI KWA WANDU WOSE

Kutunza uranu ghwa Mlungu

¹ Nendelomba waghosi weo nenyo, imi nio mghosi mumbawe na shahidi wa matiriro gha Kristo na mundu opata ubwaa ghulya ghujeonyezo.

² Liseni chagha cha Mlungu ichi amuhawile, si kwa kufunganyizilo kungi, ela kwa kushaya selyi Mlungu ashaile mudee. Mudee kazi si kwa undu ghwa kulipo, ela kwa ngolo ya kushaya kutumika.

³ Simwawafunganyizile malagho awa weo isi yenyu, ela muwaonyeze fwana yaloli.

⁴ Na ngelo mlisa mubwaa ejeoneka, mjepata kofia ya ubwaa siyedua kung'alang'ala.

⁵ Nanyose wandu wa mrika mukuseleze kwa waghosi. Nenyo inyose ni suti murware kukuseleza, na mtumikilane, kwani Mawandiko gha Kuela ghaghora, “Mlungu wanawasilogho ni wandu wakukasile, ela wanaboelogho ni wandu wekuseleza.”

⁶ Kwa hung'u kuselezeni isi ya mkonu ghwa ndighi ghwa Mlungu, eri amunule kele ngelo yake yaloli.

⁷ Mumusighile wasi ghwenyu ghose, kwani niye amulindagha.

⁸ Mkale meso, mukulinde! Kwani mumaiza wenyu Shetani uwo kemaramara sa shimba irumagha, ikehada mundu amumile.

⁹ Kaleni mumangile kele idumusi eri mumusime, mukemanya kamba wana wakwenyu urumenguni kose watiriro sa hung'o.

¹⁰ Ela Mkatiriro hung'u kwa ngelo njache, Mlungu wa mbazi yose, uyu ampang'ile mupate ubwaa ghwake ghwa kale na kale kwa ngila ya Kristo, ujedea ghose ghafweni na amhawe kumanga, ndighi na msingi ghwa fulo.

¹¹ Kwake kukale udimo kwa kale na kale. Ameni.

Maroghoi gha kudua

¹² Namwandikila barua iyi mvui kwa kuwaruro ni wakwetu Silvano, mundu nimweni na nimudumuse. Nemi nanashaile kumkumba ngolo na kumhawa ushuhuda ghwangu kamba iyi ni mbazi ya fulo ya Mlungu. Mangeni kele mbazi iyi.

¹³ Ikanisa lyio Babuloni lyisaghulo ni Mlungu na lyose wamuroghowa, na mwana wangu Marko naese wamuroghowa.

¹⁴ Roghowaneni kwa kususugana kwa mashayo. Sere ikale kwenyu inyose muo wa Kristo.