1 Petro 4 - UVORO GHWALOLI KWA WANDU WOSE

Mighendo miishi

¹ Kwa kukala Kristo wanatiriro mulini, nanyose ni suti mumange kwa ngila iyo yenyi saye, kwa kukala uwo wose esirimagha mulini, wasighana na kaung'a.

² Kwa hung'u, kufuma indakwenyi, mghendo ghwenyu aha urumenguni ghulongozo ni mashayo gha Mlungu na si tamaa za kidamu.

³ Mwanatumie ngelo iketi kughenda sa wandu wa mbari nzima, mwoluo mkeghenda kele tamaa ziwase, kukushaya, unarui, marashano, kunwa na ndighi na kutasa sanamu.

⁴ Na ndamu wandu siwedumuse washinika kwa inyo kulegha kukalanya nawo kele mighendo yawe iwase, nawo wamtukana.

⁵ Ela wejetumbulila wenyi kwa Mlungu, uyu ejetaghanya weo moyo na wafwile.

⁶ Iyo niyo ideile Ilagho Lyaloli lyichilo kwa walye wafwile na wose, eri walye wandu wataghanyo ngelo weo na muli selyi kila mumoju ataghanyogho, wakale moyo kwa roho selyi Mlungu ewo.

Watumishi waloli wa manosi gha Mlungu

⁷ Kudua kwa vindu vose kuo kavui; kwa hung'u mukumanzire na kukulinda mkelomba.

⁸ Ighulu ya ghose mushayane inyo wenyi kwa ngolo yose, kwa kukala mashayo ghanavisagha kaung'a nyingi.

⁹ Mkaribishane inyo wenyi sikweo na manung'uniko ghengi.

¹⁰ Kila mumoju atumie manosi ahawilo ni Mlungu kwa faida ya wazima, sa mdei kazi waloli wa Mlungu.

¹¹ Uyo wose echilagha, achile Ilagho lya Mlungu, uwo wose etumikagha, atumike kwa ndighi ehawogho ni Mlungu, eri kwa kila kindu Mlungu ahawo ubwaa kwa ngila ya Jesu Kristo, uyu ewo na ubwaa na nguma hata kwa kale na kale. Ameni.

Kusirima sa Mkristo

¹² Washayo, simwashiniso ni matimo ghagwaile ghekujagha ghakamsirimisagha sa kuzo ni kindu cha kigheni chimujilagha.

¹³ Ela ni bora muboelo kwa kukala mondesirima selyi Kristo asirime, eri muboelo ngelo ejeonekana kele ubwaa.

¹⁴ Baha inyo ilyi mwatukano kwa kukala ninyo wairimi wa Kristo, aho ni kughora muo na Roho ya ubwaa, Roho ya Mlungu amweni kwenyu.

¹⁵ Ela mundungi siifweni atiriro kwa kukala muulaghi ango kiting'a ango mudei makosa ango kukala mundu ohakila malagho gha wazima.

¹⁶ Ela mundu katiriro kwa kukala Mkristo, safwishike waya, ela amkase Mlungu kwa kuito mundu wa Kristo.

¹⁷ Ngelo yafika ya kudyowa kutaghanyo, na wandu wa Mlungu niwo wekalagha wa hambiri kutaghanyo. Ikakala kutaghanyo kudyowagha nesi, kuduagha ije kwa walye siwedumuse Ilagho Lyaloli lya Mlungu?

¹⁸ Selyi Mawandiko gha Kuela gheghoragha. “Ikakala yanakulile kwa wandu waloli kukila; ikalagha ije ndamu kwa wandu siwemwoghagha Mlungu na wakaung'a?”

¹⁹ Kwa hung'u, walye wetirirogho kwa kukala ni mashayo gha Mlungu kwawe, yanawafweni kwa madeo ghawe ghaloli wakuike kwa Muumba wawe, ewo mudumusiliki.