1 Petro 2 - UVORO GHWALOLI KWA WANDU WOSE

Iwe lyio moyo na mbari ya kuela

¹ Kwa hung'u sigheni ulaghelaghe ghose na ndimi na ngolo mbili na iziso na kuzighirira.

² Sa wanake wakoo, muririgho ni mazia ghaelile gha roho, eri kwa kughanwa mzegue kele ukizi.

³ Selyi Mawandiko gha Kuela ghaghoragha, “Mwaona selyi Bwana ewo waloli.”

⁴ Mumughendele Bwana, iwe lyio moyo lyileghilo ni wandu, ela kwa Mlungu ni iwe lyisaghulo na lya zoghori mbwaa.

⁵ Nenyo sa mawe gheo moyo, muwaghalo kele nyumba ya roho, andu mutumikagha sa Wakohani wa Kuela, kele kufunya sadaka za roho, zemuboela Mlungu kwa ngila ya Jesu Kristo.

⁶ Kwani Mawandiko gha Kuela ghaghora, “Zighana naika kele Zioni iwe ibwaa lya mbembeni lya zoghori mbwaa nilyisaghule. Uwo wose emudumusagha, sefwishikagha waya.”

⁷ Kwenyu inyo mudumusagha ni lya zoghori mbwaa, ela kwa walye siwedumusagha, “Iwe ilyi lyimenyilo ni wawaghali, lyakala iwe ibwaa lya mbembeni.”

⁸ Na Mawandiko gha Kuela ghamoju ghaghora, “Iwe ilyi lyakala iwe lyekwala wandu, Lwala ludeagha wandu wagwe.” Wandu wakwalo kwa kukala siwadumuse lyilya ilagho, selyi waikililo ni Mlungu

⁹ Ela inyo ninyo mbari isaghulo, Wakohani wa Mzuri, Mbari ya Kuela, wandu wa Mlungu, musaghulo kueresa madeo gha Mlungu gha mashiniko, naye wanamfunyile kufuma kizeni na kumungiza kele mlangazi ghwake ghwa mashiniko.

¹⁰ Uko hambiri simoluo wandu wa Mlungu, ela ndamu ninyo wandu wake; uko hambiri simoweni mbazi ya Mlungu, ela ndamu mwapata iyo mbazi.

Wasunyi wa Mlungu

¹¹ Washayo wangu, nendemlomba inyo, sa wagheni na wandu weita aha urumenguni, sighaneni na tamaa za muli izi zilwanagha na roho.

¹² Mkale na mghendo ghwaloli kwa wandu wa mbari nzima, eri ilyi wamushtaki kwa kudea laghelaghe, waone madeo ghenyu ghaloli, wamkase Mlungu kele Ijua lyake lyeja.

¹³ Wasikileni wandu wose weo na nguma kwa undu ghwa Bwana, mumusikile mzuri uyu ewo mtawala mubwaa,

¹⁴ muwasikile na wabwaa weo isi yake, awa awasaghule kuwalipa walaghelaghe kwa ulaghelaghe ghwawe na kuwakuma awa wedeagha ghaloli.

¹⁵ Kwani Mlungu wanashaile munyamaze maheleo gha uzimu gha wandu kwa kudea ghaloli.

¹⁶ Mkale wandu muo huru, ela ima, simwatumie uhuru ghwenyu kwa kuvisa laghelaghe, ela kaleni sa wasunyi wa Mlungu.

¹⁷ Wahaweni ishima wandu wose, washaeni wana wakwenyu wadumuse, mhaweni ishima Mlungu, mhaweni ishima mzuri.

Ifwani lya kusirima kwa Kristo

¹⁸ Inyo watumishi wa nyumba, kuselezeni kwa wana Bwana wenyu kwa ishima lyose, si kwa walye weo waloli na wa mbole tu, ela na walye wabile.

¹⁹ Kwani mukarumaghia matiriro sigheo gha hachi mkemanya niko Mlungu ashaile ni kwaloli.

²⁰ Kwani kuwo na faida muni kurumaghia makwito ghamfweni kwa kudea laghelaghe? Ela ilyi mwarumaghia makwito kwa kudea gha hachi, Mlungu umubarikiagha.

²¹ Kwani ni kwa ilyi Mlungu ampang'ilile, kwani Kristo naese wanasirime kwa undu ghwenyu na kamsighila fwana, eri muirime nywayo zake.

²² Iye sadeile kaung'a ingi, na hata saghorire ndimi ingi na mlomu ghwake.

²³ Iye atukano satukane, iye atiriro saturuse mundungi, ela oikile ikosereo lyake kwa Mlungu, uyu ataghanyagha hachi.

²⁴ Iye wanazitukile kaung'a zetu kele muli ghwake ighulu ya mwiti, eri tifwe kele kaung'a na tighende kwa hachi. Kwani kwa kushoghonolo kwake mwapata kuboa.

²⁵ Moluo mwalaghaya sa ng'onzi, ela ndamu mwauya kumwirima Mlisa na mrindiri wa roho zenyu.