1 Petro 1 - UVORO GHWALOLI KWA WANDU WOSE

¹ Imi Petro, mtumo wa Jesu Kristo, kwa wasaghulo wa Mlungu wasaghisosaghiso na wakalagha Ponto, Galatia, Kapadokia, Asia na Bithinia.

² Mwanasaghulo ni Mlungu Aba kwa lengo yake na mukaeleso ni Roho, eri mumusikile Jesu Kristo, na mueleso ni bighati yake. Mbazi na sere ikale kwenyu kwa ungi.

Ikosereo lyio moyo

³ Akaso Mlungu na Aba wa Bwana wetu Jesu Kristo! Kwa mbazi yake nyingi wanatihawile umana mwishi kwa kumuzusa Jesu Kristo kufuma kwa wafwa na katihawa ikosereo lya umana,

⁴ na kwa hung'u tio tikeeleliya kupata baraka Mlungu aikilile wandu wake mlunguni, sizedimagha kuola ango kuhakilika ango kugotua.

⁵ Nenyo kwa undu ghwa idumusi kwa Mlungu mwalindo ni ndighi zake kele ukizi ghujemanyiso ngelo za kudua.

⁶ Boeloni kwa undu ughu, hata ngera sani ndamu kwa ngelo njache mwadima kusirima kwa matimo gha kila mbari.

⁷ Ilengo lyake ni kuona selyi idumusi lyenyu lyio. Kwani hata zahabu ihakilikagha yanatimogho na moto; kwa hung'u idumusi lyenyu nalyose ni suti lyitimo selyi lyimangile. Nao aho mujepata kukaso na ubwaa na ishima lyilya Ijua Jesu Kristo eonekanagha.

⁸ Nenyo mwanamshaile hata ngera sani simumuonile, na mwamudumusa hata ngera sani indakwenyi simumwonagha. Kwa hung'u muo na kubwelo kubwaa na ubwaa ghwa maboelo ghenyu sigheghorekagha,

⁹ kwa kukala mwapata ukizi ghwa roho zenyu, ughu ghumudeile mumudumuse.

¹⁰ Wana tondolo wanatondole ighulu ya mbazi yeluo ikalagha yenyu; wekehada na kukotela ighulu ya ughu ukizi.

¹¹ Weluo wekeshaya kumanya ngelo malagho agha ghekalagha na selyi ghekujagha. Ngelo iyo niko Roho ya Kristo yeluo ikewaonyeza na kuwatambulila masirimi gha Kristo eluo urumaghiagha na ubwaa gholuo ghughairimagha.

¹² Mlungu kawamanyisa wana tondolo kamba kazi yawe siyeluo yawe wenyi, ela na yenyu. Nawo wanaghorire malagho agho inyo mwaghasikila kufuma kwa walye wamuchililagha Ilagho Lyaloli kwa ndighi za Roho wa Kuela atumilo kufuma mlunguni. Malagho agha ghanashaile kumanyo hata ni wana malaika.

Kuuzo tikale waelile

¹³ Kwa hung'u, kaleni kirani kiakili kudea kazi na mukumanzire. Muike ikosereo lyenyu kele mbazi ilya mujehawo ngelo Jesu Kristo ejeoneka.

¹⁴ Sa wana wasikilagha wa Mlungu, simwairimire tamaa zenyu za kale za uzimu.

¹⁵ Ela mukale muelile kwa ghose, selyi uyu amupang'ile ewo wa Kuela.

¹⁶ Kwani Mawandiko gha kuela ghaghora, “Mukale muelile kwa kukala imi nanaelile.”

¹⁷ Ikakala mwamwita Mlungu Aba mkelomba, naye ni mtaghanyi wa wandu wose sikweo na kumenya mundungi, sala kwa kuirimira madeo gha kila mumoju. Kwa hung'u tumieni ngelo mwasigho nayo urumenguni kirani.

¹⁸ Kwani mwamanya mwanakombolo kwa zoghori mbwaa kufuma kele mghendo sighofweni ghwa wana akeo. Siyeluo ni kwa vindu vihakilikagha, sa feza ango zahabu,

¹⁹ ela ni kwa bighati ya zoghori mbwaa ya Kristo, eluo sa mwana wa ng'onzi sewesi makosa ango ilibo lyingi.

²⁰ Naye osaghulo ni Mlungu hambiri ya kuumbo urumengu na kuonyezo kwa undu ghwenyu izi ngelo za kudua.

²¹ Nenyo kwa ngila yake mwamudumusa Mlungu, uyu amuzusile kufuma kwa wafwa na kumuhawa ubwaa, eri idumusi na ikosereo lyenyu lyikale kwa Mlungu.

²² Kwa kukala ndamu mwasikila hachi, mwaeleso roho zenyu na mwashaya wambenyu wadumuse, shayeni kila mumoju kamare ngoloni.

²³ Kwani kwa Ghore iwo moyo ya Mlungu, mwavalo uishi, si sa wana wa mvali edimagha kufwa kungi, ela sefwighagha.

²⁴ Selyi Mawandiko gha Kuela gheghoragha, “Mdamu uwo wose ni sa nyasi, na ubwaa ghwake ni sa viluwa va isakeni. Nyasi yanyala, na viluwa vapotoka,

²⁵ ela ilagho lya Mlungu lyatula hata kale na kale.” Ilagho ilyi ni Ilagho Lyaloli ilyi muchilililo