1 Johana 5 - UVORO GHWALOLI KWA WANDU WOSE

Kusima Urumengu

¹ Kila mundu edumusagha kamba Jesu ni Kristo ni mwana wa Mlungu, naye uyo wose amushaile mvali, wanamshaile na mwana.

² Kwa ngila iyi tamanya kamba tanashaile wana wa Mlungu, ilyi tamushaya Mlungu na kuwata milomu yake.

³ Kwani mashayo ghetu kwa Mlungu ni kuwata milomu yake. Na milomu yake siikulile.

⁴ Kwani kila mwana wa Mlungu ni msimi urumengu. Nagho ughu nigho usimi ghusimagha urumengu: idumusi lyetu.

⁵ Nani edimagha kusima urumengu? Ni ulya tu edumusagha kamba Jesu ni Mwana wa Mlungu.

Kumshuhudia Jesu Kristo

⁶ Uyu niye ajile kwa meji na bighati, Jesu Kristo. Si kwa meji gha ubatizo tu, ela na kwa bighati ya kifwa chake. Naye Roho washuhudia, kwa kukala Roho ni fulo.

⁷ Kuo washuhuda watatu:

⁸ Roho, meji na bighati, na awa watatu wadumisilana.

⁹ Ngera taghudumusa ushuhuda ghwa wadamu, ushuhuda ghwa Mlungu ni mubwaa. Kwani ushuhuda ghwa Mlungu ni ughu amushuhudia Mwana wake.

¹⁰ Uyu emudumusagha Mwana wa Mlungu uwo na ushuhuda amweni kwake. Uyu semudumusagha Mlungu wamudea iye kukala mndimi, kwa kukala sadumuse ushuhuda ghwa Mlungu aghushuhudia ighulu ya Mwana wake.

¹¹ Nagho ughu nigho ushuhuda, kamba Mlungu wanatihawile umana ghwa kale na kale na umana ughu ghuo amweni kwa Mwana wake.

¹² Uyu ewo na Mwana uwo na umana; uyu semwesi Mwana wa Mlungu sawesi umana.

Umana ghwa kala na kala

¹³ Nendemwandikila inyo mudumuse kwa izima lya Mwana wa Mlungu, eri mumanye kamba muwo na Umana ghwa kale na kale.

¹⁴ Na ilyi nilyo idumusi tio nalyo kwa Mlungu, kamba ilyi talomba kindu chingi kwake kuirimana na mashayo ghake atisikile.

¹⁵ Nesi ngera tamanya kamba wanatisikilagha kele kila tilombagha, aho tamanya kamba tapata ichi tamulomba.

¹⁶ Ilyi mundu amwona wakwawe kedea kaung'a siyewo ya kifwa, amulombele, naye Mlungu ujemuhawa umana ikakala kaung'a yake si ya kifwa ingi. Kuwo na kaung'a ya kifwa na sighoragha kamba iyo ilombelo.

¹⁷ Makosa ghose ni kaung'a, ela kuwo na kaung'a siyewo ya kifwa.

¹⁸ Tamanya kamba mwana uwo wose wa Mlungu sadeagha kaung'a, kwa kukala wanalindogho ni Mwana wa Mlungu, na shetani sedimagha kumwata.

¹⁹ Nesi tamanya nisi wa Mlungu na urumengu ghose ghuwo kele ndighi za ulya Mlaghelaghe.

²⁰ Nesi tamanya kamba Mwana wa Mlungu wanajile katihawa kutambukilo, eri timumanye Mlungu wa fulo, nesi tio amweni kwa Mlungu wa fulo, kwa kuwataniso na Mwana wake Jesu Kristo. Uyu niye Mlungu wa fulo na Umana ghwa kale na kale.

²¹ Wanake wachache, kulindeni na milungu ya ndimi.